Decision pakete di estudio MAVO topico di discusion politico

ORANJESTAD – Studiantenan di MAVO atrobe tabata den centro di atencion diaranson, specificamente riba e presion pa scohe nan pakete mas tempran cu normal. Lider di partido di MEP Evelyn Wever Croes ta acusa minister di enseñansa Michelle Hooyboer di a actua incorecto den e caso aki. “Dia 2 di juli minister Hooyboer a dicidi di cambia tur cos, sin informa e scolnan debidamente” Wever a bisa, acusando e mandatario di enseñansa di tuma decisionnan sin previo aviso. E mandatario algun rato despues a reacciona, indicando cu “e cambio den ley cu e ta referi na dje ta trata cambionan cu ta riba mesa pa hopi aña y gran parti di dje pa mas di 10 aña, wardando pa wordo introduci” pues nada nobo y previamente informa. Den un carta cu NoticiaCla.com a apodera di dje, e mandatario ta splica kico e cambionan aki ta. (Lesa e carta aki).

CRITICA DI WEVER

E critica di Wever ta riba ‘e decision di Minister Michelle Hooijboer-Winklaar di enseñansa pa cambia e sistema di scohe pakket den MAV’. Te cu aña pasa un studiante di MAVO mester a scohe su pakket den e di 3 aña, cu tabata Ciclo Avansa 1. Esey caba tabata tin su precupacionnan pasobra tin studiante di 14 aña cu mester dicidi e ora kico nan kier bira. E cambio aki ta poni den un landsbesluit houdende algemene maatregelen, AB 2015 no. 28, un ley cu no mester pasa Parlamento. Eyden a cambia e sistema y ta pone cu studiantenan awor den di dos aña, Ciclo Basico 2, caba mester scohe nan pakket. Despues e ta continua cu un splicacion completo di kico lo a bai robes. (lesa e articulo di Wever completo aki)

REACCION DI MINISTER

E mandatario concerni, a reacciona riba e declaracion di Wever. "Mi a tuma nota di e declaracionnan haci pa Parlamentario mr. Evelyn Wever-Croes encuanto aña escolar nobo. Lamentablemente el a admiti cu e no sa e materia sinembargo e ta dicidi di duna declaracion hopi bruha y confundi y cu informacion completamente robes”, e mandatario a bisa. Segun Hooyboer, pa loke ta e proceso di innovacion introduci na MAVO, HAVO y VWO, un evaluacion formal a tuma luga na aña 2011 bou di guia di Commissie Evaluatie Innovatie AVO cu a consisti di diferente profesionalnan den enseñansa, entre otro Inspectie, representantenan di directiva di scol, cabesante y docentenan di scol. E Commissie Evaluatie Innovatie AVO a studia varios documento y a haci analisis di e situacion. (lesa e articulo completo di Hooyboer aki).