Analisis: Liderato di ‘stranhero’ na posicionan clave: falta di talento local of fayo di sistema?

Scirbi pa Tito Laclé

Cu e reciente anuncio di un presidente-director nobo pa Banco Central di Aruba e siman aki, e discusion riba capacidad di talento local na Aruba a lanta atrobe. No ta e prome biaha: cada nombracion di un “no-Arubiano” na un puesto clave ta provoca e mesun pregunta — Realmente no tin suficiente talento local, of e sistema no ta creando ni duna oportunidad pa esaki? No compronde mi robez. No ta duda di cualidad di esnan apunta. Pero ora cu e cuestionamento di e tema ta bin hasta di skinanan ehecutivo local, esaki merece mas atencion. Laga mi splica. 

UN PATRON CU NO POR WORDO IGNORA

Ora cu e noticia e siman aki a bin di e nombracion, for di por lo menos dos ehecutivo local, bon posiciona, a bin e cuestionamento. “No tin hende local pa esey”? Y ta hendenan cu tin nan posicion fiho, sin problema. Pues no ta hende cu mester di un funcion. Pero si for di hasta nan angulo, e cuestionamento ta bin, well. E ta pone bo pensa. 

LIDERATO DI AFO

Pa varios aña caba, na cierto banconan, nos aeropuerto, hospital y otro institucionnan strategico, cada vez mas e liderato ta den man di un persona for di afo. Oficialmente, e razon ta casi semper mesun: experiencia, experticio y necesidad di “calidad internacional”. No compronde mi robez. Cada lugar mester tin e miho persona posibel, los di su origen, nacionalidad, color, raza etc. Mi ta compronde tur esey. Pero esey no ta kita afo cu bo ta cuminsa puntra si esaki ta un patronchi y cu tin algo su tras. 

E acumulacion di e nombracionnan aki ta crea un percepcion peligroso: Cu Aruba no tin confianza den su propio hendenan.

E factor LNT y salario ta un problema?

Un elemento clave den e discusion ta e introduccion di Landsverordening normering topinkomens (LNT), cu ta limita salario di funcionnan halto.

E pregunta logico ta:

Si e salario ta limita pa via di e LNT, con ainda ta logra atrae talento stranhero, of e problema no ta salario, sino falta di pipeline local?

Si talento externo ainda ta acepta e condicionnan, esaki por indica cu problema ta mas profundo: no ta falta di interes, sino falta di desaroyo local na nivel rekeri?.

POSIBEL INTERPRETACION

Tin tres splicacion principal pa e tendencia aki:

Falta di experiencia

Institucionnan grandi ta busca liderazgo cu experiencia internacional inmediato, algo cu no siempre ta disponible localmente.

Falta di planificacion di talento

Durante añanan, no a inverti suficiente den prepara profesionalnan local pa ocupa e puesto nan aki.

Preferencia  structural

Den algun caso, por tin un bias (consciente of inconsciente) pa “expertisio di afo”, considerando esaki mas confiabel.

E impacto no ta solamente simbolico:

Perdida di confianza:  ciudadano por sinti cu nan mes no tin oportunidad

Fuga di talento: profesionalnan local por busca oportunidad na exterior

Dependencia externo: Aruba ta bira dependiente di importacion di liderazgo

Desconexion cultural: decisionnan importante por wordo tuma sin suficiente entendemento local

KICO POR HACI?

Si Aruba kier cambia e tendencia, tin mester di un enfoke structural. Por pensa entre otro riba un plan di sucesion obligatorio den tur institucion clave, mentorship y transferencia di conocimiento entre liderato stranhero y talento local, inversion serio den educacion y liderazgo (no solamente tecnico, pero strategico), transparencia den nombracionnan, pa elimina duda riba preferencia. Y finalmente: revisa e LNT si ta necesario, pa sigura cu e no ta un obstaculo pa talento — local y internacional

CONCLUSION

E problema no ta simplemente si e director ta Arubiano of no.

E berdadero pregunta ta: Aruba ta creando suficiente oportunidad y preparacion pa su propio hendenan lidera?

Si e contesta ta “no”, e culpa no ta di e nombracionnan individual, sino di un sistema cu durante añanan no a construi su propio liderato.

Si nada no cambia, e tendencia lo sigui — y Aruba lo keda dependiente di talento externo pa su decisionnan mas importante.