Dushi Air ta lansa como aeroliña nobo di Aruba

ORANJESTAD– Aruba oficialmente tin un aeroliña nobo. Dushi Air a wordo presenta awe como un iniciativa local cu ta apunta pa conecta Aruba directo cu diferente destinacion den Caribe, Merca y Suramerica. Segun e directiva, Dushi Air lo cuminsa operacion den ultimo kwartaal di 2026 cu un flota inicial di tres avion tipo  ATR 72. Esaki ta un avion cu dos motor di  propeller  y ta diseña pa buelonan corto entre isla of destino cercano, y ta carga entre 60 pa 70 pasahero. E aeroliña ta en espera di su licensia AOC, pa e por cuminsa oficialmente. 

PAKICO E AVION AKI

Islanan den Caribe ta relativamente cerca un di otro (Aruba, Curaçao, Bonaire, Venezuela, etc.). Turboprop ta mas eficiente pa trayecto cortico, mientras jet ta gasta mas pa e mesun distancia. Ademas, e tin menos consumo di combustible. Compara cu jet grandi, un avion turboprop ta mas facil pa mantene, menos costoso y mas practico pa compania local. E ta adapta perfecto pa realidad di Caribe: distancia corto, mercado mas chikito y necesidad pa conexion rapido y confiabel. E plan ta pa expande e flota rapidamente. E aeroliña ta priminti prijs competitivo, servicio “isleño premium” y un experiencia autentico Arubiano desde e momento cu pasahero subi riba avion. Prome Minister Mike Eman a indica cu e iniciativa ta cuadra perfecto den e vision pa diversifica economia, mientras cu Aruba Airport Authority ya a confirma cu conversacionnan ta bay pa adapta infraestructura pa e aeroliña nobo. Un elemento unico ta cu Dushi Air lo incorpora cuminda local riba tur buelonan, incluyendo pastechi, keshi yena y refresco tipico. E promotor principal a declara: “Nos kier cu turista y local por sinti e ‘dushi feeling’ desde nan entra avion.”