Partido politico nobo PABO a presenta su mes: “Aruba mester ta bon organisa”

ORANJESTAD – Un partido politico completamente nobo, PABO (Partido Aruba Bon Organisa), a anuncia su formacion oficial ayera, cu meta pa cambia e manera con gobierno ta funciona.

Segun e lider provisional, Gunther Zievinger, PABO ta enfoca riba eficiencia, disciplina fiscal y reorganisacion completo di aparato gubernamental. E partido ta critica e sistema actual como “desorganisa y lento”.

PUNTONAN PRINCIPAL DI E PARTIDO

Entre e puntonan principal tin: reducion di burocracia cu 30%, introduci sistema digital pa tur tramite di gobierno, evaluacion anual obligatorio pa minister y departamento, limita gasto publico no necesario, reduccion salarial pa tanto minister como parlamentario, reduccion di overbruggings toelage. Tambe, ta cuminsa e proceso di cambio electoral, unda cu ta eligi un parlamento y apart ta eligi un gabinete cu su ministernan. Y porta e cambio mas grandi: Eleccion di districto, estilo senadornan na Merca. 

PABO tambe ta propone un “Ministerio di Organisacion Nacional” dedica exclusivamente pa mehora funcionamiento di gobierno.

E partido lo participa den siguiente eleccion y segun nan mesun, ya tin “hopi interes” for di hoben votadornan.