Aruba ta sostene Corsou pa kita visa pa Dominicano

WILLEMSTAD – Aruba oficialmente ta sostene Corsou den su esfuerzo pa kita e obligacion di visa pa ciudadano di Dominican Republic. Esaki a wordo confirma door di Ministerio di Desaroyo Economico. Prome minister Mike Eman y minister Wendrick Cicilia ta preparando un carta oficial pa sostene e peticion na nivel di Reino. Segun dato di Curaçao Tourist Board, kita e visa por trece alrededor di 80.000 turista extra pa aña, cu lo tin un impacto positivo riba economia, empleo y turismo. Ademas, a discuti colaboracion regional, incluyendo mas conexionnan di buelo entre e islanan, pasobra e nivel actual no ta suficiente. Tambe Aruba kier cu paisnan Caribe den Reino traha hunto riba e tema di “Landspakket”, pa papia cu un solo bos cu Hulanda. Den sector di salud, tin plan pa cooperacion entre islanan, unda cada uno por specialisa den cierto tratamentonan pa baha costo y reduci dependencia di cuido medico na exterior.