Desbalans di poder cu Hulanda ta frena lucha contra crimen na Aruba

ORANJESTAD - Un investigacion recien di Robert Candelaria ta mustra cu combate contra criminalidad “ondermijnende” na Aruba ta queda atras, no tanto pa falta di esfuerzo, pero pa falta di bon cooperacion y un desbalans di poder dentro di Reino. E portal aruba.nu a pone man riba e documento cu Candelaria a presenta recientemente como su thesis di graduacion na Universidad di Aruba. 

Segun Candelaria ta pone den su thesis, e problema principal ta cu Aruba y Hulanda no ta mira e mesun tipo di criminalidad di mes manera: Hulanda ta enfoca riba crimen organiza y flujo di placa, mientras Aruba ta mira mas riba debilidad di gobierno y integridad. Esaki ta haci cu politica y prioridadnan no ta conecta bon.

Ademas, aunque oficialmente paisnan ta igual, den practica Hulanda tin mas poder y recurso, mientras Aruba ta sinti e impacto directo di criminalidad. Esaki ta causa cu cooperacion hopi biaha ta keda limita na proyecto chikito en lugar di un estrategia largo plazo.

Investigacion tambe ta señala cu Aruba, como isla chikito, tin limitacionnan serio: poco personal, falta di conocemento specialisa y estructura debil. Esaki ta haci combate contra crimen internacional hopi dificil.

Institucionnan tambe ta vulnerabel: poca intercambio di informacion, responsabilidad fragmenta y control debil riba proceso manera permiso y aanbesteding, lo cual ta aumenta riesgo di influencia criminal.

Aun asina, tin oportunidad: locacion di Aruba cerca di Venezuela y conocemento regional por ta di gran balor pa Reino entero, pero esaki no ta wordo usa suficiente.

Conclusion di e estudio: mester un cooperacion mas igual, mihor coordinacion, y inversion structural den capacidad. Sin esaki, lucha contra criminalidad lo sigui limitado.