Filanan ta sigui largo na aeropuertonan di Merca pa pago insigur di servicio di seguridad TSA

NEW YORK - Biaheronan den Estados Unidos (Merca) a topa atrobe cu filanan largo na aeropuertonan e weekend aki, ora cu e presion di vakantie di primavera ta combina cu problema continuo causa pa un cierre parcial di gobierno. Aunke e Department of Homeland Security a indica cu personal di seguridad di Transportation Security Administration lo cuminsa ricibi nan salario atrobe for di dialuna, ainda tin hopi insiguridad entre e empleadonan.

Presidente Donald Trump a firma un memo diabierna pa reanuda e pagonan immediatamente, pero sindicatonan ta indica cu no ta cla con e medida aki lo wordo implementa. Segun representante sindical Johnny Jones, empleadonan ta puntra nan mes si e decision ta temporal of si awor TSA lo haya financiamiento completo.

Pa motibo di e shutdown, casi 500 empleado di TSA a laga nan trabou, y miles a reporta malo pasobra nan no por a cubri gastonan manera transporte y cuido di mucha. Lider sindical Everett Kelley a critica fuertemente e politiconan, señalando cu nan a sigui cu “nan propio vakantie” mientras cu trahadonan a keda sin entrada, segun un meld di CNN.

FILANAN EXCEPCIONALMENTE LARGO

E falta di personal a causa filanan extraordinariamente largo. Specialmente na aeropuertonan grandi manera:

Baltimore/Washington International Airport

George Bush Intercontinental Airport

John F. Kennedy International Airport

Hartsfield-Jackson Atlanta International Airport

Biaheronan tabata mester warda pa ora. Na Baltimore/Washington Airport, pasaheronan a haya conseho pa yega te cu cuatro ora prome cu salida di nan buelo.

MEDIDANAN EXTRA, PERO NO SUFICIENTE

Teamnan adicional di U.S. Immigration and Customs Enforcement a wordo deploy pa yuda mehora e flujo di pasaheronan, aunke gobernador di Maryland a aclara cu nan no tabata presente pa control di inmigracion. Na Houston Intercontinental, teamnan nacional di TSA tambe a ofrece soporte adicional, pero segun administracion di aeropuerto, esaki no ta suficiente pa cubri e escasez di personal. Na Atlanta, e situacion a bira un poco mas estable e weekend aki, apesar di presion extremo anteriormente.

SITUACION AINDA INSIGUR

Aunke gobierno federal ta intenta restablece e pagonan, e situacion ainda ta insigur. Pa miles di trahadonan di TSA, confianza den estabilidad financiero ainda no a wordo restaura, y esaki ta sigui impacta e operacion normal di aeropuertonan den Merca. Pa biaheronan, e recomendacion principal ta pa planifica cu mas tempu y tene cuenta cu posible retrasonan largo durante nan biahe.