MEP na Rekenkamer: Parlamento a legalisa tur pago di FASE despues

ORANJESTAD -  Parlamentario Xiomara Maduro (MEP) a responde riba conclusion di Algemene Rekenkamer cu Gobierno a paga yudansa FASE sin base legal durante pandemia. Segun e, e decision pa actua rapido tabata necesario pa yuda pueblo den un crisis grave, sin tempo pa spera pa ley formal.

E programa FASE a yuda mas cu 12.000 persona cu a keda sin entrada, cu un total di 42,8 miyon florin. Maduro ta enfatisa cu Gobierno a actua pa evita situacion mas grave den pais.

Aunke Rekenkamer ta bisa cu na e momento no tabata tin base legal, tambe a reconoce cu situacion tabata urgente y dificil. Maduro ta splica cu proceso pa crea ley a cuminsa na 2020, pero a haya tardansa, entre otro pa motibo di pandemia y eleccion.

Finalmente, na juni 2022 Parlamento a aproba e ley di FASE, loke segun MEP a legalisa tur pago cu a wordo haci anteriormente.