Partido AVP ta pidi claridad riba implementacion di ley di crèche

ORANJESTAD - Parlamentario Jennifer Arends-Reyes ta pidi gobierno pa duna mas claridad riba e implementacion di e ley di cuido di mucha na Aruba. Segun dje, e ley ta esencial pa garantiza un sistema sigur, di calidad y accesibel pa tur mucha.

Arends-Reyes kier sa con e proceso di implementacion ta bay, ki paso concreto a tuma y con gobierno lo sigura normanan claro pa calidad, siguridad y supervision di centro di cuido di mucha. Tambe el a pone enfasis riba importancia di personal capacita y profesional den e sector.

Ademas, e  ta pidi informacion riba control y inspeccion regular, y si lo tin sosten financiero of subsidio pa yuda famianan cu no por paga cuido di mucha.

Tambe ta cuestiona con sector existente ta wordo inclui den e proceso, y si gobierno ta considera un sistema digital pa registra presencia di muchanan, pa mehora siguridad y comunicacion.

E parlamentario ta conclui cu Aruba mester un sistema moderno y serio di cuido di mucha, unda e ley no ta keda papel so, sino un instrumento real pa proteha y desaroya muchanan.