PPA ta critica ineficiencia di gobierno cu ta afecta ciudadano

ORANJESTAD - Parlamentario Eduard Pieters ta denuncia un patronchi di ineficiencia den gobierno di Aruba, señalando cu sistema gubernamental ta faya y ta castiga justamente e ciudadano cu kier cumpli cu ley.

Segun Pieters, problema na DIMP a mustra con hende no por paga impuesto di auto pa falta di plachi di number, loke a crea gasto extra y situacion ilegal pa ciudadano. Awe, situacion similar ta pasa na Oficina di Censo y Registro Civil, unda hende no por haya cita pa inscribi, causando cu nan ta keda sin seguro medico.

E  ta enfatisa cu esaki no ta incidente aisla, sino un problema structural di falta di coordinacion, planificacion y liderazgo den gobierno. Mientras gobierno ta papia di digitalisacion y eficiencia, realidad ta cu sistema no ta funciona y pueblo ta sufri e consecuencia.

Pieters a conclui cu si ciudadano no por cumpli cu nan obligacion of haya acceso na servicio basico, culpa ta cay riba gobierno, no riba pueblo, y el ta pidi pa pone fin na e ineficiencia aki.