Corte: Mediador di gobierno por tene ‘solamente’ dos referendum na RIU diaranson

ORANJESTAD – Sindicato FTA (Federacion di Trahadonan di Aruba) por tene referendum diaranson, pa e trahadonan di cushina y di departamento di laundry, pero no pa e departamento di housekeeping. Asina huez a dicidi den dos diferente veredicto diamars merdia. E motivacion pa e sentencia sinembargo no ta conoci y lo bira conoci despues. Pues mediado di gobierno ta gana y perde den e caso aki.

SENTENCIA

Huez den un sentencia, a rechasa e peticion di mediado di gobierno Anselmo Pontilius pa tene referendum diaranson pa e departamento di housekeeping, y den un otro sentencia a rechasa e peticion di RIU Palace pa suspende e referendum pa cushina y laundry. E caso mes a tuma lugar siman pasa diahuebs 11 di augustus, durante cual huez enberdad a pone e fecha di diamars pa dicta un sentencia.

CASO DIALUNA

Sinembargo, dialuna RIU a bolbe hiba mediado di gobierno corte, unda cu huez a dicidi e ora pa duna RIU un chens pa dicidi pa diamars mainta, si nan ta laga FTA representa e trahadonan di henter e hotel, evitando asina multiple referendum. RIU na su turno, no tabata cla pa duna un contesta concreto y mes momento FTA (cu tambe tabata un partido den e caso) mirando e situacion a opta pa miho tene un referendum toch. Partidonan como tal no a haya otro, cu a pone cu huez mester a dicta sentencia diamars merdia. Pues esey ta nifica cu diaranson awor, tin 2 referendum, y ta keda pendiente e referendum pa trahadonan di housekeeping. Lesa e veredicto contra housekeeping aki. Y lesa e veredicto pro referendum cushina y laundry aki.