MEP ta exigi claridad riba nombramento di director nobo na WEB

ORANJESTAD – Fraccion Movimiento Electoral di Pueblo (MEP) a pidi aclaracion oficial tocante e reciente nombramento di un director (technico) nobo na empresa estatal WEB, poniendo enfasis riba transparencia y cumplimiento di regla di “good corporate governance”. Den un carta oficial, fraccion lider Evelyn Wever-Croes ta referi na reportahenan den media tocante e nombramento, y ta solicita informacion adicional pa verifica si e proceso a wordo conduci segun principio di igualdad di oportunidad y transparencia.

MEP a presenta un serie di 10 pregunta critico, incluyendo si a tin un proceso di solicitacion habri promé cu e nombramento, unda y con e vacante a wordo publica, y kico tabata e criterio di seleccion pa e posicion. Tambe nan kier sa cuanto persona a aplica y kiko tabata e calificacionnan di e candidato escogi en comparacion cu otro candidatonan. Adicionalmente, e fraccion ta cuestiona si e proceso a cumpli cu regla di good governance,  specialmente si no a tin un solicitud habri. Nan ta pidi splicacion kico motibo por a wordo sigui un otro ruta y si esaki no ta contra principio di transparencia y igualdad.

Un otro punto importante ta si Raad van Comisaris a hunga su rol correctamente y si tur procedimiento a wordo sigui segun regla vigente pa empresanan di gobierno.

MEP ta exigi cu autoridadnan responde e preguntanan dentro di tres siman, cu fecha limite fixa pa 16 di april 2026. Cu e accion aki, MEP ta pone presion riba gobierno pa duna claridad riba e nombramento y pa sigura cu confianza den maneho di empresanan estatal ta keda intacto.