KvK: Refineria aworaki no ta realistico den e situacion actual

ORANJESTAD - Posicion di Camara di Comercio (KvK) riba e asunto di refineria no a cambia. "KvK ta keda mescos. KvK no ta contra refineria, pero ta realistico cu esaki no ta un option viable den e situacion actual y esun di e ultimo añanan". Asina presidente di Camara di Comercio Daphne Lejuez a bisa NoticiaCla.com awe mainta. "Es mas, e tipo di industria aki ya no ta cuadra cu un vision di energia duradero y sostenibel". Mientras cu KvK ta compronde e impacto cu e refineria tawata tin riba e economia di San Nicolas, KVK tambe kier keda realistico y ta keda urgi gobierno pa sinta na mesa cu stakeholders pa traha riba un plan realistico pa San Nicolas y no converti esaki den un rancamento di siboyo politico.

HOTEL NA SAN NICOLAS

Encuanto hotel pa San Nicolas, aki tambe KvK ta keda mantene su posicion encuanto carrying capacity y e ROI (Return on Investment) cu un proyecto 100% all-inclusive por tin pa e economia di San Nicolas. Manera semper, KvK ta keda dispuesto pa sinta na mesa pa dialoga y purba yega na solucionan beneficioso pa henter Aruba.