Oduber: Prome di september kier introduci parkeermeters na Playa

ORANJESTAD – Prome di september ta e fecha cu lo introduci e parkeermeters, segun minister di transporte Otmar Oduber. Falta algun ley cu tin cu wordo pasa ainda, cu ta pega na Raad van Advies. Pero ta spera cu pronto esaki tambe por keda cla. E mandatario no ta considera e introduccion di e parkeermeters como un medida, sino un alivio pa comunidad. A compara e situacion cu otro partinan na mundo cu ya caba ta custumber cu ta paga pa parkeer, y cu tin sumanan mucho mas halto pa ora.

E LEY DI PARKEER

Despues di un retraso di casi 7 luna, e ley di parkeermeter y parkeervak, a pasa na juli ultmo, cu ta nifica cu e parkeermeternan por drenta den funcion aworaki. E cantidad di voto pro tabata 11 mientras cu 5 a vota contra, ta wordo trata porfin diaranson mainta den parlamento. Inicialmente, -y manera NoticiaCla.com a raporta recientemente ainda-, e ley mester a wordo trata despues di reces, pasobra no tin espacio prome. Sinembargo pa sorpresa, e vice presidente di parlamento Chris Dammers a confirma na NoticiaCla.com diamars mainta cu a dicidi toch, pa pone e tratamento riba agenda pa 8’or diaranson mainta trempan. Pero e motibo principal ta cu a bin un ‘buraco’ liber diripiente debi cu un otro ley no a keda cla.

PERSONAL CLA

Segun Dammers, tin un grupo di persona cu ta cla pa cuminsa traha, pero como cu e ley no a pasa, nan no por traha y ta sin entrada. Como tal e ta perhudicando nan. “Y e ley ta cla. No tin motibo pa strobanan. Den caso asina tin hende cu a renuncia di otro trabou, y awor ta sin nada, sin pago”. Dammers a bisa. Unabez cu e ley aki pasa, e ta autorisa e compania encarga, pa cuminsa opera e meternan y henter operacion rond di dje.

RETRASO INICIAL

No menos cu un siman pasa ainda, NoticiaCla.com a raporta cu e parkeermeters lo core un retraso atrobe di por lo menos dos luna y mei, prome cu nan por funciona. E ley di parkeermeter porfin a yega parlamento, pero no por a wordo trata ainda. E ta fecha 23 di juni cu e la drenta parlamento, pero segun vice presidente di parlamento Chris Dammers a confirma na NoticiaCla.com e ora, cu no tabatin fecha pa trat'e. Mas probable lo a trata esaki despues di reces, cu tabata inifica mitar pa fin di augustus. Tanten, e parkeermeters no por a  funciona.

CONTENIDO

E ley ta ensera un serie di asunto cu tin cu wordo regla, variando di entre otro stipulacion di asina yama ‘parkeervakken’, meter mes, e permiso pa e compania por opera, permiso pa duna multa, pone klem na auto, y confisca auto despues. Tambe ta duna e parkeerwachter e permiso pa actua. Tur esaki mester wordo regla pa medio di e ley di por lo menos 11 pagina, prome cu por pensa di introduce esaki.

MULTA

Algun punto cu ta resalta, ta e multa cu un hende ta haya si nan ‘viola’ e ley, esta si nan no cumpli cu pago pa e espacio cu nan a parkeer. E suma stipula segun e ley, ta 75 florin. E ta duna e parkeerwachter e permiso e ora, fuera di cobra e multa, pa pone e auto riba un ‘klem’ pa e periodo di dos ora. Despues di e dos oranan, e takelwagen tin permiso pa takel e auto en cuestion. No ta conoci cuanto e persona tin cu paga si a takel e auto. E placa cu recauda, tanto di e meter usa, como multa, ta bay pa e compania cu tin e consesion, esta esun cu ta cay bou di Arubus.

INSTALACION

Manera NoticiaCla.com a raporta recientemente, Arubus a cuminsa instala e spotnan di parkeermeter, y a opta pa usa e caya Wilhelminastraat bay ariba, pa e prome 25. Unabes caba cu esey, nan lo sigui cu e proximo 25. Pero ta trata solamente di e base nan y no e meternan mes. Esey lo bin unabes cu e ley keda cla. No ta conoci cuanto base a pone caba. Pero ta comienso di mei a cuminsa. Mientras cu e ley no pasa, nan lo sigui pone e basenan, y inicia nan campaña di concientisacion y informacion. Lesa e contenido di e ley aki.