MEP: Contestanan minimo riba biahe oficial pa Hulanda di minister, ta laga mas pregunta cu respuesta

ORANJESTAD – Un documento oficial di Gobierno di Aruba, produci pa partido di oposicion MEP, a revela cu e contestacionnan riba un serie di pregunta tocante un biahe oficial pa Hulanda di minister Gerlien Croes na november di aña pasa, ta extremadamente limita, cu mayoria di e respuesta nan reduci na un solo referencia: “mira pregunta 1”. Algo cu segun e partido MEP, ta dificil pa considera algo responsabel di e minister en cuestion. E minister a bisa na varios biaha si, cu mientras cu e partido heel kier sigui su interogatorio riba e biahenan, e ta sigui ‘traha pa Aruba’, indicando cu e tin miho cos pa haci cu worry cu e preocupacion di e partido geel. 

DOCUMENTO

Segun e documento, e meta oficial di e biahe tabata pa participa den e reunion di RMR (Raad van Ministers van het Koninkrijk). Sin embargo, pa casi tur otro pregunta—incluyendo cu ken a papia, kico a wordo discuti, y cual resultado a wordo logra—no a duna detaye adicional. E falta di informacion ta destaca specialmente den preguntanan importante manera: Cu cual instancia a sostene reunionnan, kico tabata e temanan concreto trata, si tin algun resultado politico, huridico of acuerdo concreto. Tur esakinan a wordo contesta simplemente cu “mira pregunta 1”.

INVITACION?

Tambe no ta cla si e biahe tabata resultado di un invitacion externo of iniciativa propio di ministerio. Incluso riba pregunta di cooperacion of acuerdo nobo, no a duna ningun aclaracion. E unico punto unda un respuesta diferente a wordo indica ta den pregunta 7, unda a menciona “aki bo respuesta”, pero sin ningun contenido adicional.

TRANSPARENCIA

E manera cu e documentacion a wordo presenta ta lanta cuestionnan riba nivel di transparencia y informacion comparti cu Parlamento, segun e partido MEP. Mientras e biahe tabata oficial y di interes publico, e falta di detaye ta laga espacio pa interpretacion y critica, segun e partido. Ademas, ta bisa cu e documento ta forma parti di un proceso di control parlamentario, pero segun e contenido, e informacion comparti te awor ta limita na un minimo.