Promesa di gobierno y realidad na Parkietenbos ta choca: holor stinki ta intensifica

ORANJESTAD – Riba e mesun dia cu gobierno a anuncia y priminti cu lo tuma accion pa elimina e problema di holor na Parkietenbos, diferente ciudadano a tuma contacto cu NoticiaCla pa reporta cu e situacion no a mehora — al contrario, a bira peor.

Segun testimonio cu a yega na redaccion, for di mainta tempran e holor stinki tabata presente den w barrio, pero den oranan di merdia e intensidad a aumenta significativamente. Ciudadanonan ta bisa cu e holor ta bin for di diferente direccion, loke ta laga hende confundi y preocupa riba e origen exacto di e problema.

E situacion aki ta crea frustracion, especialmente pasobra e promesa reciente di gobierno pa atende e problema. Pa hopi residente, e expectativa tabata crea expectativa, pero mientrastanto loke nan ta experencia awor ainda ta un realidad distinto.

Habitantenan ta pidi mas claridad y accion concreto, no solamente palabra. Nan ta enfatisa cu e problema di holor no ta algo nobo, pero un asunto cu a dura hopi tempo y cu ta afecta calidad di bida den e area.

Te na momento di publicacion, no a bin ningun reaccion adicional di autoridadnan tocante e kehonan mas reciente. Ciudadanonan, sinembargo, ta sigui spera pa solucion  structural y efectivo pa un problema cu, segun nan, ta bira insostenibel.