DNM ta lidera Earth Hour 2026: Aruba ta paga luz pa salba naturalesa

ORANJESTAD – Directie Natuur y Medio Ambiente (DNM) ta uni atrobe cu e movimiento ambiental mundial mas grandi: Earth Hour 2026. Como simbolo di compromiso cu medio ambiente y cambio di clima, DNM lo paga e luznan di su edificio monumental na San Nicolas pa un ora.

Earth Hour, un iniciativa di World Wide Fund for Nature (WWF), tin como meta pa crea conscientisacion global riba proteccion di naturalesa. E accion lo tuma lugar diasabra 28 di maart 2026, entre 20:30 y 21:30, unda lo paga tur luz no esencial.

DNM, hunto cu WWF Hulanda, ta haci un yamada fuerte na gobierno, empresanan y comunidad pa participa activamente. Ciudadanonan por tuma parti pagando luznan na cas durante e ora ey y compartiendo nan accion riba social media cu e hashtag #earthhour.

Meta pa e aña aki ta amplia participacion den Reino, pa manda un mensahe mas poderoso: Aruba ta consciente y comprometí cu proteccion di su medio ambiente.