DVG: Uso ilegal di medicina pa baha peso ta pone salud na peligro

ORANJESTAD - DVG ta alerta comunidad di Aruba riba e uso peligroso y cada bes mas frecuente di medicamentonan pa baha peso manera Ozempic, Mounjaro y Wegovy. E medicinanan aki ta destina principalmente pa trata diabetes tipo 2 y obesidad cu supervision medico, pero hopi hende ta usa nan sin prescripcion.

Tambe tin un aumento den compra ilegal via online, cu ta crea riesgo grandi pasobra e producto por ta falso, contamina of no warda corectamente.

Segun PAHO/WHO, uso incorrecto di e medicinan por causa problema serio di salud, incluyendo pancreatitis, problema di vesicula y bloqueo di tripa.

DVG ta haci un yamado claro na comunidad pa no usa e tipo di medicacion sin conseho medico, no cumpra via canal ilegal y semper consulta un profesional di salud.