Na Italia, conductor di boto acusa pa morto di arubiana Julina de Lannoy

ORANJESTAD – Ministerio Publico (OM) na Italia a finalisa e investigacion riba un accidente cu a sosode na Lago di Como, unda aña pasa zomer e bailarina Hulandes di origen Arubiano, Julina de Lannoy (33), a perde su bida. E conductor di 45 aña di e taxi-boto cu tabata transportando nan, ta wordo acusa di homicidio culposo (morto pa culpa). Segun fiscal, e homber tabata bou di influencia di alcohol y droga. E medio Italiano La Provincia a informa esaki basa riba documento di caso. E sospechoso, sin embargo, a nega cu el a usa droga e dia ey.

E accidente fatal a sosode diasabra 12 di juli 2025 den oranan di atardi. Julina tabata riba un boto gehuurd hunto cu siete amiga. Mientrastanto nan tabata nabega na distancia recomenda for di costa, e taxi-boto di Enrico Molteni a choca contra nan boto cu un velocidad di aproximadamente 30 km pa ora. Door di e impacto, Julina a wordo tira for di e boto. Segun investigacion, e conductor no a reacciona suficientemente lihe pa paga e motor, cu a causa cu e propeller a golpia Julina den awa. E la a sufri heridanan hopi serio na un arteria y a muri poco despues den hospital na Como.

ALCOHOL Y DROGA

Investigacion di Guardia di Finanza a mustra cu e conductor a test positivo pa sustancianan psicoactivo y cu su nivel di alcohol tabata un tiki riba e limite legal. Durante un busqueda na su cas, polis a haya 1 gram di marihuana y casi 100 gram di un droga “the exotico” ilegal. E sospechoso a declara cu e no a usa ningun sustancia e dia di e accidente.

FISCAL LO DICIDI DESPUES SI E CASO LO BAI TRIBUNAL.

Julina a nace na Aruba y tabata biba na Bruselas, unda e tabata traha na Hema. Den Bruselas y Amsterdam e tabata conoci como un bailarina activo, entre otro pa su clasnan di twerk. Organisacion Femme Confidence a describi’e   como un profesional dedica cu semper tabata brilla durante evento. Na Aruba, e la tambe contribui na desaroyo personal di mucha  hoben muhernan. Diferente organisacion a mustra nan dolor pa su fayecemento, describiendo Julina como un persona cu tabata trece alegria, energia positivo y conexion entre hende.