SVOA: Rector Colegio Arubano retira despues di ruptura di confiansa

ORANJESTAD – Stichting Voortgezet Onderwijs Aruba (SVOA) a anuncia den un carta e siman aki cu e rector di Colegio Arubano, Ryma van der Linde, lo mester laga su funcion entrante 1 di april 2026. E decision a wordo tuma despues cu a sali na cla cu e rector ainda tabata oficialmente den servicio di Dienst Publieke Scholen (DPS) na momento di su nombramento.

CARTA

Segun un carta oficial manda na personal educativo dia 23 di maart 2026, SVOA ta indica cu Van der Linde tabatin oportunidad suficiente pa regla su situacion laboral anterior, sea door di entrega dimision na DPS of door di informa SVOA. Segun e directiva, esaki no a tuma lugar.

RUPTURA DI CONFIANSA

“E hecho cu señora Van der Linde no a informa cu el ainda tabata den servicio di DPS, a conduci na un ruptura di confiansa,” e carta ta bisa. Como resultado, e directiva a dicidi cu el mester laga su funcion como rector per 1 di april 2026. Desde 23 di maart 2026, el a wordo libera di su trabounan.

REUNION CU PERSONAL

SVOA a indica cu lo tin un reunion den corto plazo cu personal di Colegio Arubano pa duna mas splicacion tocante e situacion y pa contesta eventual pregunta of comentario.

E directiva tambe a pidi cooperacion y comprension di personal durante e periodo aki, pa asina garantisa continuidad di e proceso educativo.

SITUACION LABORAL TABATA CAUSA PRINCIPAL

E caso ta draai rond di e  echo cu Van der Linde, cu a wordo nombra rector per 1 di oktober 2025, ainda tabata oficialmente vincula na DPS. E circunstancia aki, segun SVOA, a crea un situacion incompatible cu su funcion como rector. 

REEMPLAZO

Te ainda no a wordo comunica publicamente ken lo asumi e puesto di rector interinamente of permanentemente.

CONTINUIDAD DI ENSEÑANSA

SVOA ta enfatisa cu e decision a wordo tuma den interes di e organizacion y pa proteha continuidad di enseñansa na Colegio Arubano. Mas informacion lo sigui despues di e reunion cu personal, segun e directiva.