Gobierno ta buscando inversionista pa prestamo di USD 160 miyon den Merca y Europa

ORANJESTAD – Minister Geoffrey Wever a biaha pa New York, London y Amsterdam pa reuni cu banco y inversionista internacional, como parti di un estrategia pa fortalece posicion financiero di Aruba.

E mision ta enfoca riba refinancia parti di debe nacional, incluyendo un prestamo di cerca USD 160 miyon na exterior. En total, Aruba mester refinancia aproximadamente 506 miyon florin den 2026.

Gobierno kier diversifica su acceso na capital, ampliando su presencia no solamente den Merca pero tambe na Europa, pa reduci riesgo y crea mas opcion financiero.

Durante e reunionnan, delegacion lo presenta e situacion economico di Aruba, progreso den maneho financiero y reciente upgrade di rating di Fitch. Meta ta pa crea confiansa cu inversionistanan y posiciona Aruba como destino confiabel.

Gobierno tin intencion pa completa e transaccion pa fin di april, mientras otro parti di debe lo wordo refinancia localmente.