Cuerpo Policial Aruba ta celebra 29 aña di existencia

ORANJESTAD  - Miembronan di Cuerpo Policial di Aruba dialuna a haci acto di presencia na e tradicional celebracion di misa pa conmemora e aniversario di e cuerpo. E aña aki a celebra e di 29 aniversario di Cuerpo Policial y a conmemora tambe e di 40 aña di Scol pa Polis. Alto Comisario mr. Adolfo “Dolfi” Richardson a brinda bonbini na invitadonan, miembronan di Cuerpo Policial y pensionadonan di Cuerpo Policial cu a uni hunto den un ambiente colegial y di famia pa un celebracion despues di misa. El a subraya cu ta un bon señal cu tur hende ta biba cu Cuerpo Policial. El a haci un apelacion tambe pa coleganan refleha riba e “dicon” nan a scoge pa bira polis, el a pidi pa pueblo tene Cuerpo Policial den nan oracion y pa dirigentenan bin hunto den e proceso pa resolve y purba di supera e retonan confrontando e pais. Alto Comisarion Richardson a bisa cu Cuerpo Policial ta sigui enfoca riba su “human capital” y percura asina pa e organisacion sigui den su trayectoria di profesionalisacion. Mas y mas inversion den su hendenan, cu diferente curso pa mehora nan calificacionnan ta halto riba e lista di puntonan di agenda di maneho, el a añadi. E enfoke ta keda riba e personal, cu ta keda e parti central di e funcionamento y operacion di Cuerpo Policial, Richardson a conclui bisando.