Arends (RAIZ): Turismo desbalansa ta presiona Aruba – “Mester gara e toro na su cacho awor”

ORANJESTAD – Lider di partido  politico RAIZ, Ursell Arends diabierna a alerta cu Aruba no ta enfrenta “overtourism”, pero un turismo desbalansa, principalmente door di crecemento rapido di turismo crucero y vacation rentals. Segun dje, e isla a supera su capacidad di carga, pero pese a hopi rapport y plan, e cambionan necesario pa un turismo sostenibel a keda riba papel.

Arends ta señala cu turismo crucero a crece cu mas di 230% den ultimo decadas y cu pa 2026 Aruba por supera 1 miyon bishitante crucero, loke ta crea presion riba infrastructura, congestion den trafico y sobrecarga di beachnan.

Pa corrige e situacion, RAIZ ta propone medida concreto manera priorisa turismo ‘stayover’, limita cantidad di barco pa dia, introduce impuesto ambiental pa cruceristanan, restringi acceso na areanan sensitivo y implementa un plan di reduccion gradual di turismo di masa.

Segun Arends, gobierno actual no ta mustra suficiente compromiso pa tuma e decisionnan necesario. El a enfatisa cu Aruba no tin mas tempo pa warda y cu mester tuma decisionnan dificil awor pa proteha calidad di bida y naturaleza pa futuro generacionnan. Pa lesa e articulo original y completo, click AKI