RIU tin te diamars mainta pa dicidi si ta acepta FTA como sindicato

ORANJESTAD – Diamars mainta 10’or RIU Palace tin cu informa corte si nan ta acepta e proposicion di huez, esta di reconoce sindicato FTA pa henter e hotel, y asina evita mas referendum. Di otro banda, huez lo dicta un sentencia den curso di dia. Esey ta loke a resulta di e caso cu huez a trata ayera den corte entre Riu y mediado di gobierno. Pues, palabra ta keda na e hotel Spaño.

CASO

Tabata diahuebs ultimo cu RIU a bolbe manda mediado di gobierno corte, pa para e referendum programa pa diaranson awor. “Nan kier a para e otro dos referendumnan tambe” abogado Hose Figaroa a splica NoticiaCla.com dialuna. Den e caso di dialuna, huez a propone na RIU pa e djis reconoce FTA pa henter e hotel y laga sa mas tarda diamars mainta. E caso pa siman pasa tabata referendum pa housekeeping. Esey di dialuna, tabata pa laundry y cushina. E caso siman pasa a dura apenas 1 ora, y cu hues lo mester a dicta sentencia dia 18 di augustus (un dia prome cu e referendum ta programa pa tuma lugar). Segun Figaroa, el a sinti cu e caso a bay bon, pero tabatin cu warda pa e sentencia mes.

E CASO

Manera cu NoticiaCla.com a raporta siman pasa, RIU hotel a dicidi di  hiba mediado di gobierno corte atrobe, pa motibo di referendum pa departamento di housekeeping. Presidente di sindicato FTA, Hubert Dirksz a confirma esaki pa NoticiaCla.com. Segun e lider sindical, -mescos cu a haci den un caso anterior-, e hotel ta sinti cu no por tene un referendum den e forma cu ta haciendo esaki y como tal kier pa huez para esaki. E intencion ta pa e referendum tuma lugar dia 19 di augustus awor.

CASO ANTERIOR

Den pasado caba, RIU a hiba e mediado corte caba pa para tres referendum na e hotel. Cada referendum tabata pa diferente departamento di e hotel. Mientras cu RIU a argumenta cu no tin problema pa sindicato drenta, pero no e forma cu nan kier haci'e, huez a dicta na fabor di e mediado ultimo biaha. E sentencia a conduci cu a tene e referendumnan. Pero pa malasuerte di e sindicato e tempo ey, e trahadonan di housekeeping no a gana e referendum, cu a pone cu, -cu excepcion di e otro dos referendumnan gana-, e departamento ey a keda sin representacion sindical. E opcion tabata e ora pa tene un otro referendum. Y awor esey ta programa pa tuma lugar otro siman.

ABOGADO WIX

Abogado di RIU, Ronny Wix a confirma siman pasa cu  e caso lo a tuma lugar, pero no kier a bay den detayes, sino a mas bien referi na e caso mes. Unico cos cu e la declara, ta cu 'e casonan ta diferente'. Wix no tabata disponibel pa comentario dialuna pa NoticiaCla.com.