Rey Willem-Alexander na su salida: Aruba ta duna mi energia tur biaha di nobo

ORANJESTAD – Rey Willem-Alexander ta mira bek cu satisfaccion riba su bishita na Aruba. E isla ta duna dje tur biaha “simplemente energia”, asina e a bisa poco prome cu su salida pa Corsou na prensa local y hulandes. E bishita tabata centra riba cuarenta aña di Status Aparte y cincuenta aña di existencia di bandera y himno di Aruba. Na mes tempo tabatin atencion pa asunto actual manera tensionnan geopolitico, migracion y e presion di turismo masivo riba e isla.

E Rey a bisa cu Aruba ta “sigur di su mes” y cu e pais ta mira pa futuro cu confianza, mientras cu tambe e ta enfrenta e problemanan existente. E la menciona e crecemento fuerte di turismo como un factor importante. “Mi ta bin aki desde 1987 y ya di e tempo ey nan tabata bisa cu nos mester wak cu nos no laga demasiado turista drenta. Y awor e cantidad a crece enormemente”, segun Willem-Alexander.

Segun e Rey, turismo y migracion ta conecta estrechamente y nan desaroyo ta causa presion riba servicio manera educacion y cuido di salud. Alabes e a enfatisa e resistencia di e isla. “Bo ta mira e resistencia y forza cu Aruba ta mustra.” Rey Willem-Alexander a bisa cu Aruba ta “un bon ehempel” den Reino. “Sociedad ta cuida pa otro y nan ta percura pa otro”, e a bisa.

Durante e actividadnan final na Aruba, e Rey a papia cu hobenan y mayor y a participa den un accion di planta mata.