Artistanan caribeño ta haya acceso directo na fondo cultural hulandes

DEN HAAG – Artistanan y creadornan den parti caribeño di Reino lo haya di awor aceso directo na subsidio di e Fondo Podiumkunsten di Hulanda. Esaki ta resulta for di un cambio den e regla pa muziekhubs, cu a drenta na vigor riba 16 di maart 2026. Motibo di esaki ta un ahuste den e regla existente pa pop, hiphop y dance, unda pa prome biaha a inclui un paragrafo separa pa e parti caribeño di Reino. Asina, artistanan y organisacionnan for di, entre otro, Corsou, Aruba y Boneiru por aplica pa nan mes pa subsidio pa desaroyo di talento y presentacion.

CREADORNAN INDIVIDUAL

Nobo ta cu no solamente organisacionnan, pero tambe creadornan individual por califica pa apoyo. Condicion ta cu nan ta biba den parti caribeño di Reino. E regla ta enfoca riba desaroyo di talento musical, facilitacion di presentacionnan y duna guia, tanto artistico como comercial. E cantidad di subsidio ta maximo 40.000 euro pa organisacionnan y 20.000 euro pa aplicantenan individual. Un parti di e presupuesto lo wordo reparti pa isla, mientras cu aplicacionnan lo wordo trata segun orden di entrada. Cu e cambio aki, pa prome biaha ta wordo crea un instrumento specifico cu ta tene cuenta cu escala y structura di sector musical caribeño. Te awor, creadornan for di region tabata cay bou di regla hulandes mas amplio, unda nan tabata tin mas dificil acceso na financiamiento. E regla lo contribui na mas desaroyo di sector musical riba e islanan y fortalece posicion di artistanan caribeño den Reino.