Na Corsou, Rey Willem-Alexander a ricibi sjaal “Blue Wave” pa apoya Corsou

WILLEMSTAD – Rey Willem-Alexander a ricibi durante su corto bishita di trabou na Corsou, un sjaal blauw di e team di futbol di Corsou The Blue Wave, cu e peticion pa durante Mundial e tambe usa esaki banda di un sjaal oraño. Asina e por anima tur dos paisnan den Reino, Hulanda y Corsou. E momento a sigui despues di un anochi unda e Rey a papia cu habitantenan den Willemstad riba e tensionnan geopolitico den region. Den un ambiente informal na Vittle Art, a tuma luga combersacion cu representantenan di diferente parti di sociedad tocante posicion di Corsou entre Venezuela y Estados Unidos.

ARTE, HISTORIA Y COMUNIDAD

Na Vittle Art, e Rey a wordo ricibi pa iniciador Kris Kierindongo, kende a presenta su proyecto como un lugar unda arte, historia y comunidad ta uni. Loke a cuminza como un iniciativa personal – un atelier riba un cancha di basket bieu di su tata – a crece te bira un lugar creativo cu atencion internacional. Durante e encuentro, e Rey, hunto cu gobernador Mauritsz de Kort y staatssecretaris Eric van der Burg, a papia cu ciudadano nan riba seguridad, migracion y e contexto geopolitico mas amplio. E combersacionnan aki a forma e punto central di su bishita na Corsou, despues di un programa na Aruba. Rond di 8’or di anochi e bishita a finalisa y e Rey a regresa Hulanda. E momento simbolico cu e sjaalnan a duna e bishita un cierre mas leve, despues di un anochi unda e seriedad di e situacion den region tabata central.