Aruba a amplia serie di nummerplaat pa motibo di aumento di cantidad di auto

ORANJESTAD – Aruba ta amplia e serienan disponible di nummerplaat pa vehiculonan, pa motibo di e crecemento continuo di e cantidad di vehiculonan registra. Esaki ta sali na cla for di un   regla ministerial nobo publica den e Afkondigingsblad.

Segun e minister di Finansa  , e ahuste aki ta necesario pa motibo di e aumento di vehiculonan y e presion administrativo cu esaki ta causa. Door di pone mas serie di number disponible, gobierno kier preveni cu e serienan existente no keda agotado.

E regla ta reemplasa e tabla existente cu combinacionnan di placa y ta amplia e capacidad pa diferente categoria di vehiculo. Asina, vehiculonan regular cu letra A por yega te 90.000 number, mientras cu tambe pa taxi, auto di huur, truck y motor nan tin serie specifico cu a wordo establece of amplia.

Registracion di vehiculonan a cuminza di nobo despues di semanas di para pa falta di placa

For di e anexo ta resulta cu, por ehempel, taxi (TX) por ricibi te 515 placa y auto di huur (V) te 8.500. Tambe pa transporte di carga y motorfiets nan tin combinacionnan separa y maximo establece.

E regla a drenta na vigor y tin efecto retroactivo te cu final di september 2025.