Doño di Bahia Principe cu ultimatum pa gobierno di Aruba!!

ORANJESTAD – E doñonan di e proyecto hotelero pa San Nicolas, Bahia Principe, a duna gobierno di Aruba un ultimatum pa dicidi riba e proyecto. Fuentenan fidedigno di NoticiaCla.com a confirma dialuna cu den un carta dirigi na conseho di minister, e doñonan ta mustra cu nan ta duna gobierno ultimatum di algun siman, pa tuma un decision clave riba e asunto di refineria. Gobierno mester dicidi si ta scohe pa e refineria of e proyecto hotelero. Y si gobierno dicidi cu ta refineria ta bin, e ora e proyecto ta para. Y si tarda mas cu e ultimatum poni, tambe e proyecto ta para.

NO TA WARDA MAS

“E grupo no tin pensa di warda mucho mas prome cu nan tuma nan decision”, ta loke fuentenan fidedigno serca di e proyecto a confirma na NoticiaCla.com. Y e carta cu tin pa conseho di minister, ta papia palabra cla. De hecho, e desaroyadornan ta wardando basta caba y tin un tardansa di 6 luna caba, debi na burocracia pa keda cla cu e permisonan.

PROBLEMA NOBO

For di siman pasa tin rumornan ta circula riba e problema ‘nobo’ aki, unda cu gobierno ta haye dilanti algun dilema, tur relaciona cu e posibel re-apertura di e refineria. E prome ta si ta sigui cu e proceso pa busca un cumprado (posibel candidato ta Citgo, subsidiario di PDVSA), y asina elimina e plan di bin cu algo ‘berde’ pa San Nicolas, esta algo cu no ta refineria. Si laga e proyecto hotelero cay, e ta perde un chens pa rebiba San Nicolas, y si e proyecto hotelero cay, NoticiaCla.com a compronde cu tin un minister cu lo no acepta y lo pone su pia abou.

MINISTER DELIBERANDO

NoticiaCla.com a compronde cu den seno di e minister, ta deliberando riba e scenario nan aki, y lo mester formula un punto di bista, cu despues lo keda presenta na conseho di minister. NoticiaCla.com a compronde cu e mandatario en cuestion no ta contento cu e desaroyo di e reapertura di e refineria, ya cu e ta pone e proyecto hotelero den problema.

DI DOS FRACASO HOTELERO

Si dado caso e desaroyadornan di e hotel para riba, y dicidi cu nan no ta continua cu e proyecto, ta bira e di dos hotel cu no ta logra, bou di cartera di e actual minister di turismo. Y NoticiaCla.com a compronde cu e no lo kier laga esaki sosode. Prome Bushiri cu ta cay na awa, y awor esun di Bahia Principe. NoticiaCla.com tin informacion cu e minister no ta dispuesto pa para e proyecto hotelero, y cu si cos sigui den direccion manera cu e ta, esta cu ta sigui cu e plan pa e reapertura, no ta descarta cu conseho di minister lo tin cu saca nan conclusion. Mayan mainta e mandatario tin un conferencia di prensa, unda cu mas probable e lo divulga informacion riba e topico delicado aki.