Rey Willem-Alexander a bishita Mariniers Kazerne

SAVANETA - E bishita di SM Rey Willem-Alexander a continua na Base di Marina Hulandes na Savaneta, unda Su Mahestad a reuni cu commandante suplente di Marina Real di Caribe Hulandes Kolonel Ramakers, Commandante di Marinierskazerna Savaneta, Teniente Kolonel van Wijk y cu embahadornan Hulandes staciona na Washington, Bogota y Caracas.

Durante un reunion cu participacion di e Gobernador di Aruba, e Prome Minister di Aruba mr. Mike Eman, director di VDA JuriNicolaas, y Altocomisario Ramon Arnhem, a intercambia puntonan di bista riba temanan relaciona cu pas, siguridad y e situacion geopolitico mas amplio. E dialogo a resalta e importancia di continua cooperacion y bon relacion den Reino Hulandes ora ta trata desaroyonan regional.

Ademas a enfoca riba e balor di e relacion fuerte entre Aruba y Hulanda, subrayando cu cooperacion y apoyo mutuo dentro di Reino ta hunga un rol importante den mantene stabilidad y siguridad. E combersacion a refleha e compromiso comparti pa sigui traha hunto y mantene coordinacion ora situacionnan surgi cu ta pidi cooperacion entre e paisnan di Reino.

E bishita di Su Mahestad na Aruba a pone enfasis riba e relacionnan fuerte den Reino Hulandes y a forma un parti significativo di e celebracionnan cu ta marca e aniversarionan historico di Aruba.