Big Leaguer Melvin Mora ta confirma su Baseball Academy na Aruba

ORANJESTAD – E ex big leaguer Melvin Mora a anuncia su proyecto di un baseball academy na Aruba recientemente. Durante un conferencia di prensa na Estados Unidos e basebolista profesional cu ta forma parti di e Hall of Fame di Baltimore, no por a contene su emocionnan pa comparti su siguiente proyecto cual ta un Baseball Academy na Aruba. Minister Otmar Oduber tabata un di e invitadonan special di Sr. Mora y a ricibi e confirmacion di un inversion miyonario cu e Hall of Famer aki lo kier mira na Aruba. E no ta haci mencion di cua team esaki lo ta, y si ta Orioles of si e ta keda esun cu inicialmente NoticiaCla.com a haci mencion di dje na juni, esta cu ta bira e base di Los Angeles Dodgers. 

MORA NA ARUBA

Durante Melvin Mora su bishita na Aruba recien, e la keda encanta cu nos isla y cu porcierto ta un conoci di nos talentonan local. Mora a comparti veld cu compañeronan di Orioles manera ta Sidney Ponson, e conoce tambe Eugene Kingsale y Radames Dijkhoff. Tambe Calvin Maduro cu keto bay ta traha di cerca cu Baltimore cual recientemente a firma un otro talento local den persona di Gillian Wernet.

SOSTEN DI GOBIERNO

E mandatario a comenta esaki caba cu su colega e Minister di Deporte. “ Y mi por bisa cu ta henter gobierno di Aruba ta entusiasma cu e idea aki. Mi kier a gradici Melvin, cu promedio di e organisacion di Baltimore, dentro di poco ta inicia cu un proyecto hopi bunita.”. Na luna di october lo tin un proyecto piloto encabesa pa e organisacion di Baltimore unda nan lo percura pa tur e muchanan den bario ricibi e ekiponan. Esaki den anticipacion pa e Baseball Academy di Melvin Mora riba nos isla.

CONFIRMANDO PRIMICIA DI NOTICIACLA.COM

Tabata na juni caba cu NoticiaCla.com a bin cu e primicia aki prome, anunciando cu posiblemente e aña aki ainda Aruba ta bira e base permanente di un ekipo di baseball profesional mericano, y cu esaki lo posiblemente ta di Los Angeles Dodgers Baseball Camp pa e region aki. Minister di deporte Alex Schwengle a confirma esaki e tempo ey na NoticiaCla.com, aunke e detayenan ainda no tabata mucho cla. E intencion tabata pa, enves di uza Venezuela como nan base, muda esaki pa Aruba y uza nos isla pa e base. Esey ta nifica cu, -riba costo di LA Dodgers-, nan lo opera un campo profesional di baseball y recluta hungadornan di region pa nan organisacion. Como condicion, Aruba kier garantia di algun hungador pa aña forma parti di e grupo aki. Tin bista riba e tereno di Winston pa esaki.

ARUBA ENBES DI VENEZUELA

E mandatario a mustra cu enberdad awe e lo mester a topa e grupo pa haya sa tur detaye. Pero loke e por bisa, ta cu e no ta un iniciativa di gobierno sino di e propio organisacion di baseball. Ta netamente un caso di ‘malo pa uno, bon pa otro’, den sentido cu pa motibonan di problema na Venezuela, e organizacion ta prefera di sali y muda nan operacion pa Aruba. NoticiaCla.com a compronde cu e organisacion ta canando su caminda caba manera entre otro DIMAS y otro instancianan pa nan sigura cu tur cos cana bon. Nan a practicamente haya luz berde di gobierno y si ta bon, pa september ainda, e operacion lo por cuminsa.

RED TAPE

E mandatario a compromete cu lo facilita e ‘red tape agilisa’ esta cu ta trata pa e proceso di permiso bay mas facil, pa asina hacie interesante pa e organisacion. Esaki ta nifica cu lo procesa posibel ‘visa’ y otro papeleo di futuro ‘miembronan di e campo’ ora cu nan bin keda eynan, pa e por ta un proceso ‘no complica’. Segun e mandatario, bo no por ofrece algo asina pero cu un sistema complica di papeleo. Pues cu esaki lo coopera, den margen di ley.

BOOST PA ARUBA

E ta sigur un boost pa Aruba y pa deporte, mirando cu Aruba ta haya un reconocemento di tin un base di un organisacion di baseball profesional manera LA Dodgers establece su mes na Aruba y uza nos isla como base. E publicidad y trafico deportivo cu e ta genera ta inmenso, pa no papia mes di e beneficio cu esaki por tin pa hungadonan potencial di Aruba pa cu Grandes Ligas.

SCOUT

Ainda Aruba ta haya bishita basta frecuente di scout nan cu ta bin Aruba periodicamente pa busca talento y firma nan ora cu nan ta convenci cu e talento tin potencial. Na Aruba tin entre otro personanan manera Chu Halabi, cu ta porta esun mas popular riba e tereno aki y a firma algun cu tabata grandi den e deporte aki.