LaSorte( AHATA): Cera laman pa un dia pa luna no ta yuda proteha naturalesa

ORANJESTAD - Cera laman pa un dia pa luna no ta yuda proteha naturalesa . Asina e CEO di Aruba Hotel & Tourism Association (AHATA) Tisa LaSorte a declara na e medio di comunicacion Viral 297. Segun LaSorte, proteccion di nos naturalesa ta un sentimiento grandi cu ta biba den curason di cada ciudadano di nos pais. Nos beachnan, mondi, flora, fauna, tur ta forma parti di nos identidad y tambe di nos economia. Nos naturalesa ta nos rikeza, un base sigur di nos industria turistico. Proteha nos naturalesa ta un responsabilidad di cada ciudadano. LaSorte den e entrevista reciente, a menciona cu si di berdad kier proteha nos naturalesa, no por djies cera nos lamanan of beachnan un dia pa luna pasobra esaki lo no yuda y lo no haci diferencia na e bida maritimo. 

SIMBOLICO 

“Esaki por ta algo simbolico berdad, pero e lo perhudica hopi hende financieramente y lo no tin diferencia positivo pa nos naturalesa. Loke mester haci pa proteha e naturalesa ta baha e presion diariamente, un dia pa luna so lo no yuda”, e la expresa. LaSorte a enfatisa cu mester tuma decisionnan cu realmente ta haci diferencia pa nos naturalesa. Entre otro, drecha riba Bubali Plas. E la duna di conoce cu AHATA tin hopi aña ta papia di e urgencia di e riesgo di contaminacion di lama, cu a wordo indica den e raport di Carmabi. Esaki tin prioridad urgente.

PROBLEMA DI UTV

Tambe e la menciona cu pa hopi aña ta discutiendo riba regulacion pa UTV-nan cu ta indica unda mag y unda no mag di core pa no kibra nos naturalesa. Cera beach y lama pa un dia mientras cu tin crucero y hopi turista, no ta yuda y sigur lo no domina e problema di UTV. Solucion lo ta pa pone regulacionnan di unda nan por core y stop di importa nan y caba cu nan poco poco.

COMBERSA 

Segun LaSorte, mester bin cu conversacionnan mas elabora riba e tipo di turismo cu Aruba kier atrae, ki tipo di actividad kier ofrece turismo y con nos ta bay proteha nos naturalesa. “Haci algo cu ta impacta diariamente. Por dicidi tambe cu cada dia no kier mas di un of dos cruiseship bin Aruba. Baha e cantidad di turista cu ta yega Aruba diariamente. Haci algo cu tin efecto real riba naturalesa y no algo simbolicamente solamente”, el a enfatisa.

DECISION DRASTICO 

El a agrega cu tur decision drastico cu tuma, lo afecta hende. Si regula uzo di UTV miho, e ta afecta operadornan di UTV. Si cera lama, e ta afecta piscadonan y esnan cu kier bay landa, e negoshinan di boto. “Den tur caso, tur decision cu un minister tuma, ta bay afecta un hende. Pero loke ami ta bisa ta cu si bo ta bay afecta un hende financieramente, laga esaki tin su efecto positivo riba naturalesa. Y cera lama un dia pa luna, ta afecta hopi hende pero no tin efecto positivo riba naturalesa”,  LaSorte a finalisa bisando.