Wever: Ley pa proteha consumidor a drenta na vigor

ORANJESTAD – Minister di Finansa, Asunto Economico y Sector Primario, Geoffrey Wever, a anuncia cu e ley pa proteccion di consumidor oficialmente a drenta na vigor 15 di maart 2026, riba Dia Internacional di Consumidor. E ley nobo ta fortalece proteccion di consumidor y ta duna Aruba Fair Trade Authority (AFTA) un rol central den supervision y aplicacion di e reglanan. Cu e ley aki, AFTA lo por investiga violacionnan, duna instruccion na companianan pa coregi nan practica comercial y impone sancion y boet ora necesario. Segun Wever, e ley lo contribui na un mercado mas husto y transparente y lo proteha consumidornan contra practica manera mercadeo falso, condicionnan di contract no rasonabel y envio di productonan sin cu e consumidor a pidi esaki. Gobierno y AFTA a prepara e implementacion durante 2025. Como prome paso, AFTA lo cuminsa informa publico y haci investigacion di mercado. Mas despues den 2026 lo wordo lansa e ConsuLoket, un portal digital unda consumidornan por entrega nan keho. Segun e minister, cu e ley aki Aruba ta tuma un paso importante pa fortalce posicion di consumidor y crea condicionnan mas igual pa negoshinan den economia.