Paisnan Europeo no ta hopi entusiasma pa mision den Estrecho di Hormuz: ‘Esaki no ta nos guerra’

EUROPA – Diferente pais Europeo no ta mustra hopi entusiasmo pa yuda cu reabrimento di e Estrecho di Hormuz. Presidente americano Donald Trump a bisa den un entrevista cu Financial Times cu paisnan di OTAN mester aporta na esaki. Segun e, si esaki no sosode, e alianza militar lo enfrenta “un futuro hopi malo”. Trump ta bisa cu “no ta mas cu logico cu paisnan cu ta beneficia di e Estrecho, tambe yuda pa sigura cu nada malo no sosode ey”. Despues di e prome atakenan di Israel y Merca, Iran a blokea gran parti di e Estrecho di Hormuz, un ruta di nabegacion importante pa transporte di petroleo.

‘ESAKI NO TA NOS GUERRA’

Despues di e palabranan di Trump, varios pais Europeo ta mustra cautela pa drenta den e conflicto. Prome minister britanico Keir Starmer a bisa cu Reino Unido “no ta laga su mes wordo hala den e guera” y cu reabrimento di e importante estrecho maritimo no ta un tarea di OTAN. Italia tambe no ta mira posibilidad pa amplia misionan di su marina militar te na e Estrecho di Hormuz. Alemania tambe no ta kere den un mision di OTAN. “Kico Trump ta spera di un puñado di barconan di guerra Europeo? Nan por haci algo cu e poderosa marina di Merca no por haci?”, ministro di defensa Boris Pistorius a bisa. “Esaki no ta nos guera, nos no a cuminsa cu esaki.” Segun prome minister Rob Jetten di Hulanda, e pais tambe pa momento no lo hunga un rol den proteccion di e estrecho. “Nos mester ta honesto: cu e cantidad di atake cu ta tuma luga ey actualmente, ta hopi dificil pa pone un mision na marcha den corto tempo.” Tambe EU jefe pa asunto exterior, Kaja Kallas, a enfatisa cu formalmente e region no ta parti di area di trabou di OTAN. “No tin ningun pais di OTAN situa den e Estrecho di Hormuz.”