Prome operacion di cerebro cu bril Hololens na Aruba

ORANJESTAD – Horacio Oduber Hospital (HOH) na Aruba a ehecuta pa prome biaha un operacion di cerebro cu ayudo di un bril Hololens hunto cu un sistema di neuronavegacion. E operacion a tuma luga den cooperacion cu Universitair Medisch Centrum Utrecht (UMC Utrecht) y ta wordo considera un primicia pa Aruba.

E technologia ta haci posible pa ciruhanonan mira imagen tridimensional di anatomia di e pashent durante e operacion. E imagen nan ta basa riba scan diagnostico manera CT-scan of MRI-scan. Cu ayudo di e Hololens, e imagen nan ta wordo proyecta den tres dimension durante e operacion, loke ta permiti e ciruhano navega cu mas precision den e area di operacion.

Segun neurociruhano dr. Greg Laclé di HOH, tabata trata di un operacion compleho na banda drechi di cerebro di un pashent cu epilepsia. Danki na combinacion di neuronavegacion y e Hololens, e ciruhano por a mira den tempo real e structuranan anatomico individual di e pashent. Asina por a determina cu hopi precision unda e tumor tabata situa y por a kita e tumor completo y na un forma seguro.

Aplicacion di e technologia a sigui poco despues di operacionnan cu e mesun metodo na Hulanda. Tres siman pasa e Hololens a wordo usa pa prome biaha durante un operacion di cerebro na Amsterdam, un siman despues na Utrecht, y despues na Aruba.

Jacco Vroegop, presidente di e directiva di HOH, a bisa cu e operacion ta un paso importante den desaroyo di cuido medico na Aruba. Segun dje, e cooperacion cu UMC Utrecht ta trece gran bentaha pa e isla y pa e region. Cu e Hololens ta posible pa cambia imagen bidimensional di scan nan den imagen tridimensional, loke ta permiti ciruhanonan mira exacto unda nan ta situa den e curpa y con, por ehemplo, venanan di sanger ta core.

Tambe neurociruhano Tristan van Doormaal di UMC Utrecht a enfatisa e importancia di e cooperacion. Segun dje, HOH tin e equipo y e ekipo humano necesario pa ehecuta neurocirugia compleho na un nivel halto. Esaki ta haci cu cada biaha mas cuido specialisa por wordo ofreci na Aruba mes, enbes di mester manda pashentnan pa tratamiento na exterior.