HOH ta lansa sistema digital HIX pa modernisa cuido medico na Aruba

ORANJESTAD – Horacio Oduber Hospital (HOH) a lansa oficialmente e sistema digital HIX, un plataforma moderno cu lo digitalisa y integra informacion medico di paciente y proceso clinico den hospital. E introduccion di e sistema ta marca un paso importante den modernisacion di servicio medico na Aruba.

E activacion oficial a tuma luga durante un ceremonia den presencia di directiva di HOH, minister di Salud Publico Mervin Wyatt-Ras, prome minister Mike Eman y diferente profesional di salud cu a participa den e implementacion di e proyecto. Durante e acto simbolico, un conteo regresivo a marca e momento cu e sistema oficialmente a drenta na uso.

Segun directiva di hospital, e implementacion di HIX ta resultado di un proceso largo di preparacion y colaboracion entre diferente ekipo di profesional. E sistema ta permiti digitalisacion completo di informacion medico di paciente y lo facilita comunicacion entre diferente departamento di hospital.

Cu e plataforma nobo, doctor y personal medico por accede informacion di paciente den un manera mas rapido, sigur y eficiente, algo cu lo contribui na miho coordinacion di tratamiento y cuido medico.

Durante e ceremonia, representante di gobierno y hospital a felicita e ekipo cu a traha pa haci e proyecto realidad. Segun minister Wyatt-Ras, innovacion tecnologico den sector di salud ta esencial pa garantiza servicio medico moderno y di calidad pa comunidad.

Prome minister Mike Eman tambe a resalta importancia di inversion den tecnologia, indicando cu sistema manera HIX ta yuda prepara sector di salud pa reto di futuro.

Cu introduccion di e sistema digital HIX, HOH ta fortalece su posicion como un institucion moderno den cuido medico, enfoca riba innovacion, eficiencia y mehor servicio pa pueblo di Aruba.