Islanan BES no por haci uso di prestamonan favorable di Union Europeo

DEN HAAG – Aunke Comision Europeo kier haci posible pa paisnan y teritorio ultramar (unda parti Caribense di Reino di Hulanda ta cay) presta placa serca Union Europeo bou di condicionnan favorable, e municipionan special Bonaire, Sint Eustatius y Saba lo no por haci uso di e opcion ey.

Den contesta riba preguntanan di e comision di Tweede Kamer pa relacionnan di Reino, secretario di estado pa asuntonan di Reino, Eric van der Burg ta indica cu e islanan BES bou di e ley actual FinBES no tin permiso pa contrae prestamonan.

Pa e paisnan CAS e situacion ta diferente. Segun Van der Burg: “Pa Corsou y Sint Maarten ta aplicabel cu Hulanda tin un sistema di inscripcion continuo riba prestamonan. Esaki kier bisa cu si e paisnan kier emiti un prestamo pa servicio di capital, Hulanda lo inscribi (si nan cumpli cu normanan di e ley di supervision financiero pa Corsou y Sint Maarten) contra e rendimiento actual riba prestamonan di estado pa e periodo correspondiente.”

Pa Aruba ta aplicabel cu den e propuesta di e Rijkswet Houdbare Overheidsfinancien Aruba (HOFA) tin un facilidad di prestamo cu condicionnan similar.

Debido na esaki, no ta spera cu e islanan lo busca un prestamo serca Comision Europeo, segun Van der Burg.

Si di tur forma un pais contrae un prestamo serca Union Europeo y e obligacionnan di e prestamo no wordo cumpli, e ora Reino di Hulanda (como estado miembro) lo wordo tene responsable. Segun e secretario di estado, no ta spera cu un escenario asina lo sosode.

E preguntanan y contesta ta relaciona cu e decision nobo LGO pa e periodo 2028–2035. Comision Europeo ta propone pa dobla e presupuesto pa e islanan cu 900 miyon euro. Si e estadonan miembro lo acepta esaki ainda ta insigur. E gobierno hulandes tambe ainda no a tuma un posicion definitivo riba e asunto. NOTA: Articulo cortesia dossierkoninkrijksrelaties.nl