Rey Willem-Alexander a despedi di avion tipo Boeing 737 di KLM

AMSTERDAM – Rey Willem-Alexander a haci dialuna cu a pasa su ultimo buelo cu un Boeing 737 di KLM. E rey awor lo sigui un entrenamento nobo pa bula cu avionnan di familia Airbus A320neo. Den un video publica riba cuenta di LinkedIn di Koninklijk Huis, e ultimo buelo di e rey a wordo mustra. Willem-Alexander tabata bula cu e Boeing 737 for di 2017. Segun e rey, loke a haci e trabou ey special tabata principalmente e variedad di pasaheronan cu el a transporta. “Nos a bula di Feyenoord y AZ Alkmaar bai Prague pa UEFA Europa League, muchanan bai Lapland pa topa Santa Claus, pero tambe buelonan di vakantie bai Ibiza y Malaga,” asina e Rey a recorda.

FLOTA NOBO PA KLM

KLM ta den proceso di renoba su flota di Boeing 737NG durante e añanan cu ta bin, reemplasando nan cu avionnan di familia Airbus A320neo. Actualmente, e compania ya tin 14 avionnan Airbus A321neo den servicio. Na principio di e luna aki, e avion mas reciente a wordo agrega na e flota. Den e periodo cu ta bin, KLM ta spera ricibi mas avion di e tipo aki. “Mi ta spera cu mi lo por ricibi e mesun compania colorido di pasaheronan atrobe den Airbus,” e Rey a comenta.