Dificil pa aerolineanan controla fluho di pasahero for di Venezuela

ORANJESTAD – Mientras cu pa gobierno, e bista di venezolanonan ‘turista’ cu ta lastra cu nan maleta riba caminda tin nan atencion, e turistanan aki tambe ta ‘aporta’ na economia di Aruba. Sinembargo, e situacion ta uno mas problematico cu hopi ta kere. Un articulo cu a keda publica den prensa hulandes recientemente, ta pinta un cuadro actual di e situacion na Aruba. Ademas, algun aerolinea di Venezuela a mustra na NoticiaCla.com cu e situacion ta birando pio tur dia. Un mapa financiero publica awe mainta pa e portal financiero Business Insider, ta confirma cu Venezuela ta e pais cu menos credibilidad financiero na mundo awe. Un motibo sigur pa bandona e pais.

DIFICIL PA CONTROLA PASAHERO

For di dos ehecutivo di aerolineanan venezolano, NoticiaCla.com a compronde den fin di siman, cu e situacion ta uno cu nan no tin bou di nan control. “Nos ta conciente cu hopi venezolano ta bin Aruba y cu ta wordo poni bek riba e mesun avion”, un ehecutivo cu a prefera di keda anonimo, a bisa NoticiaCla.com. “Riba nos avionnan e ta minimal pero e ta sosode casi diario. Problema ta cu nos no tin control riba e caso aki”. For di autoridad di Aruba, envolvi cu e parti aki, NoticiaCla.com ta compronde cu esaki no por ta berdad. “Tur aerolinea ta comprometi pa cumpli cu e regla y ley cu tin. Si nan no cumpli, nan ta haya multa!” e fuente aki a bisa NoticiaCla.com. Di otro banda, e ta compronde si, cu den e situacion actual, ta dificil pa confia y comproba tur esaki.

CONTROL LIMITA NA VENEZUELA

Ta resulta cu mientras cu na Aruba e venezolanonan turista ta wordo scrutina ora cu nan drenta, y pidi pa nan documentonan na ordo, y informacion riba nan situacion financiero, esey no ta un obligacion na Venezuela. “Nos por puntra, pero no ta un obligacion pa un pasahero venezolano duna nos e informacion ey. Nos no por exigi esaki di nan. Como tal, nan por subi avion, sin e control ey” e fuentenan a sigui bisa. Consecuentemente ora cu nan yega Aruba, y nan no cumpli cu e rekisitonan, nan ta wordo poni bek riba e mesun avion. “Riba nos avionnan, tin 3 pa 5 pasahero cu ta bay bek. Pero riba otro aerolineanan, e ta mucho mas halto”. Y nan a mustra cu ora cu e pasahero wordo debolbe riba e avion, ta e aerolineanan tin cu carga cu e gastonan tambe. “Algo cu nos tin cu biba cun’e” e fuentenan a sigui bisa.

AEROLINEA CUBRIENDO NAN MES

Esey ta splica e motibo tambe cu algun luna pasa, algun aerolinea riba nan mes a cuminsa postula informacion na nan bali, bisando cu pasaheronan mester tin 500 dollar pa persona pa por biaha pa Aruba. Algo cu a crea un bruhacion pa hopi biahero, cu ‘no tabata sa di e regla nobo aki’. A resulta cu e regla aki no tabata un regla ‘nobo’, sino mas bien un di e rekisitonan cu Aruba a bin cun'e basta tempo caba, y cu ta conoci pa tur aerolinea. Ta solamente cu e aerolineanan ey, kier a ‘cubri nan mes financieramente’ en caso si e pasahero wordo debolbe bek.

ARTICULO HULANDES

Banda di e situacion aki, dos articulo den prensa hulandes (NRC), a raporta extensamente riba e ‘fenomeno’ aki, unda cu nan ta mustra cu cifras, y entrevista, con serio e situacion na Aruba ta. A papia p.e cu un venezolano cu a yega Aruba y cu awor ta yudando su ‘compatriotanan’ cu ta yega Aruba, con cu e por. Ta trata di un persona cu apenas 4 luna a yega Aruba, y ya ta trahando legalmente, debi cu e ta ‘haci negoshi’. Primordialmente real estate, y huur ekipo di transporte cu turista.

PSUEDOTURISTA

E esencia di e articulo hulandes, ta cu venezolanonan ta drenta como turista, pero no ta bolbe nan pais mas. Nan ta keda Aruba y ta busca trabou sea legal of illegal. Algun ta haya permiso (manera e venezolano cu ta hiba e nomber di ‘Carlos’. Otronan no tin e mesun suerte. Den e articulo tambe ta relata un combersacion cu un persona di DIMAS cu ta confirma cu e situacion ta uno fastioso. Ta papia di ‘psuedoturista’ y cu e cifra ta creciendo, aunke cu e cantidad oficialmente no ta conoci y ta dificil pa midi. Cruz Cora ta raporta cu nan tin miedo pa un influx di venezolano, y cu nan no tin suficiente lugar en caso nan bin haci peticion riba e shelternan cu nan tin.

NEGOSHI CU VENEZOLANO A CAY

Un comerciante cu NoticiaCla.com a papia cun'e, ta keha cu e benta cu venezolano a baha cu 70% y cu tin varios tienda grandi di renombre den un mall di renombre, ta cla pa sera porta. Ta haci mencion di entre 7 pa 10 tienda, cu tin cu sera nan porta proximamente pasobra e situacion ta asina deplorabel. “Si enberdad bin cu un visa awor pa venezolano, nos tur por wel di sera nos porta” e comerciante a bisa. “Ta lastima cu un grupito di venezolano ta bin Aruba bin daña e nomber di e bon venezolano cu si ta cumpra” e comerciante a finalisa bisando. NOTA. Foto ta cortesia NRC Handelsblad.