Esaki ta e deal pa a haya trahadonan Cool Casino bek na trabou

ORANJESTAD – “Berdad cu minister a intermedia, pero e proposicion presenta, no a wordo acepta”. Tumando nota di declaracionnan haci riba NoticiaCla.com riba e situacion laboral di Cool Casino, fuentenan fidedigno serca di e negoshacionnan, a revela na NoticiaCla.com cu cos no a bay ‘manera cu minister a bisa’. Y ademas, minister lo a viola un acuerdo di ‘mediastilte’ te ora cu partidonan firma un protocol.

PROPOSICION DI GOBIERNO

A mustra cu entre otro, e proposicion inicial pa haya e trahadonan di Cool Casino bek na trabou, tabata cu ‘ trahadonan ta wordo tuma bek, pero cu un schorsing di 6 dia sin pago’. FTA lo a nenga e proposicion aki rotundamente, mirando cu nan no por a acepta cu trahadonan ta wordo castiga. ‘Di ningun forma, ni cu retiro, pero tampoco cu schorsing sin pago’. Esaki pasobra segun e fuentenan, e trahadonan a haci uso di nan derecho di manifesta.

COOL CASINO ACUERDO

Na final, Cool Casino a bay di acuerdo cu lo no duna ningun sancion a cambio cu e trahadonan no cuminsa un caso di daño y perhuicio pa nan tips cu nan a perde durante e dianan cu nan no tabat'ey. Basa riba esey, nan retiro a wordo anula y ‘nan ta cobra nan salario pa tur e dianan cu nan tabata na cas." 

FTA

Pa loke ta e sindicato mes, e presidente di FTA a confirma cu trahadonan di Cool Casino enberdad a bay traha, pero no kier a bisa mucho mas, debi na e "media stilte" cu a wordo jama. Di otro banda, a lamenta cu minister si a viola e acuerdo ey. NOTA: foto ta di un siman pasa diadomingo ora cu sindicato FTA a sinta cu minister Paul Croes pa inform'e di e situacion e momento ey na Cool Casino.