Ombudsman Bryson: Mester miho acceso na informacion y sistema di keho na Aruba

ORANJESTAD - Ombudsman di Aruba, Jurima Bryson, a publica e rapport “Het Luisterend Oog”, basa riba un investigacion haci entre augustus y september 2025. E estudio a identifica 564 instancia na Aruba cu ta cai bou di mandato di Ombudsman, hopi di nan ta organizacion priva cu ta traha cu mucha y hoben, manera scolnan y centronan di cuido.

INFORMACION TA SCARSE

Investigacion a mustra cu na hopi instancia informacion importante no ta actual of facil di haña, manera number di contacto of procedura pa entrega keho. Den sector di cuido di mucha, menos cu mitar di e centronan tin un sistema di keho cla y funcional. Tambe e registro nacional di centronan di cuido no semper ta actual.

MEHORA TRANSPARENCIA

Ombudsman ta recomenda pa mehora transparencia, actualisa registronan y sigura cu tur instancia tin un sistema di keho accesibel, pa fortalece proteccion di ciudadanonan, specialmente mucha y hoben. Ombudsman lo sigui controla con e recomendacionnan ta wordo implementa.