SVB lo tuma supervision riba ley di pension over

ORANJESTAD – Gobierno di Aruba a dicidi cu Banco di Seguro Social (SVB) lo tuma supervision riba Ley General di Pension (LAP) pa sector priva. Cu esey, pa prome bez lo bin control estructural riba cumplimiento di e ley, cu ta na vigor desde 2011.

MOCION

Segun parlamentario di AVP John Hart, e desicion ta sigui un mocion cu recientemente fraccion di Partido Arubano Volkspartij a presenta den Parlamento. E mocion a pidi gobierno pa nombra un supervisor cu lo controla si empleadornan y empleadonan realmente ta contribui na fondo di pension manera e ley ta prescribi.

LEY 

Ley General di Pension ta aplica pa mas o menos 38.000 empleadonan den sector priva na Aruba. E ley a wordo introduci pa sigura cu empleadonan ta acumula pension durante nan carrera y tin seguridad financiero den edat mas halto. Segun Hart, sinembargo, e ley a haya poco atencion durante hopi aña, specialmente den area di supervision y aplicacion. El a indica cu Conseho Socio-Economico (SER) ya na 2017 a informa gobierno di e tempo, Wever-Croes I, cu no tabatin ningun instancia cu tabata controla e implementacion di e ley. Esaki a causa cu durante  tempo largo no tabata cla si empleadornan tabata cumpli cu obligacionnan di e ley di pension.

Gobierno entretanto a informa cu SVB lo cumpli e rol di supervisor. Segun Hart, e paso ey ta esencial pa garanti cu empleadonan realmente ta ricibi e pension cu segun ley nan tin derecho riba dje. “Pa un mercado laboral balancea, ta importante cu empleadonan por confia cu nan derechonan di pension ta wordo respeta,” asina e parlamentario a bisa. E tema a wordo menciona anteriormente tambe durante e prome Dialogo Social di gobierno AVP/FUTURO, unda a confirma cu Ley General di Pension ta wordo evalua y posiblemente lo wordo adapta. Segun Hart, awor ta importante cu gobierno no mira solamente riba e ley, sino tambe riba problema estructural den mercado laboral cu ta influi riba su implementacion. El ta aboga pa fortalece  e proteccion di empleadonan mas y e confianza den sistema di pension.