ATA: Porfin KLM lo cambia su flota pa Aruba

ORANJESTAD/ BERLIN - E ekipo di A.T.A. a reuni recientemente cu KLM na Hulanda durante e bolsa di balor turistico ITB na Berlin pa explora e posibilidad di expansion di nan capacidad pa Aruba. Specialmente pa introduci mas capacidad den Business Class y nan producto di Premium Economy. “ Porfin por confirma cu lo cambia e flota pa Aruba y Aruba lo tin mas stoel di categoria Business Class & Premium”, ATA a bisa dialuna segun nan com unicado. Esaki ta importante, mirando cu ultimo tempo tin hopi keho di pasaheronan di KLM cu ta mustra cu KLM tabata manda su ekiponan ‘bieu’ pa Aruba, mientras cu pa otro destinacion manera Bogota, si tabata manda ekipo nobo y mas servicio Business Class. Bek pa e reunion actual, tambe ATA a bisa cu ta sigui ahusta pa asina captura e oportunidadnan cu tin pa crece conhuntamente den e mercadonan secundario manera e paisnan Nordico, Alemania, Italia y Reino Uni.

ITB

Aruba Tourism Authority (A.T.A.) a tuma parti activamente na ITB Berlin 2026, e feria di turismo mas grandi di mundo, caminda ta enfoca riba fortalece e posicion como un destinacion di calidad, cu enfasis riba conectividad aereo, colaboracion cu e industria y como parti di e strategia di diversificacion, un crecemento balansa y sostenibel. Europa ta un mercado clave den e strategia di diversificacion pa Aruba su turismo. Pa e motibo aki, e obhetivo e aña aki ta pa sigura cu e crecemento di 2.7% visitor arrivals cu a realisa na 2025 compara cu 2024, por continua den un manera sostenibel mientras cu ta sigui enfoca riba e segmento afluente den e diferente paisnan.