Total di 21 mil alumno ta bay scol bek na Aruba dialuna

ORANJESTAD – Un total di 21.000 alumno na Aruba ta bolbe scol entre awe y resto di siman. For di e grupo aki, por lo menos 10.400 ta scolnan catolico. Contrario na e añanan anterior, ta parse cu e biaha aki si no tin ‘sorpresa’ pa loke ta scolnan cu ‘no ta cla’ of cu no por habri pa un of otro motibo. Y manera custumber, e preparacion final tabata ainda andando den fin di siman. Bazaar aki, aya, compras final, y e consehonan a custumbra di e politiconan di varios partido politico.

BAZAAR

Gobierno hunto cu Business Improvement District (BID) a organisa un ‘back to school bazaar’, pa asina atrae trafico den caya grandi, y asina incentiva actividad comercial den centro di ciudad. Ademas di prijsnan atractivo obtenibel te den oranan di anochi, tambe publico por a disfruta di diferente actividad manera beach tennis, Dino Jump pa mucha y DJ’nan di Electric Festival riba Plaza Daniel Leo.

MENSAHENAN

Pa loke ta e mensahenan, minister di enseñansa Michelle Hooyboer Winklaar tabatin di dje cla : “Tur esunnan cu ta cuminsa un aña escolar nobo pa prome biaha, of ta sigui nan estudio, mi ta desea nan un aña excelente, fructifero y alegre! Na tur maestro di scol, mi ta gradici boso di antemano pa e trabou boso dilanti y ta desea boso hopi energia, inspiracion y sabiduria”, asina Hooyboer-Winklaar di Enseñansa a duna di conoce na ocasion di apertura di aña escolar 2015-2016. Minister di hubetud Paul Croes no a keda atras. "Pasenshi, perseverancia y hopi animo na cada docente, juffrouw y meneer cu e tarea importante di educa y guia nos yiunan", Minister Paul Croes a indica. . "Mayornan enfoca riba e desaroyo di bo yiu. E tarea principal ta di mayornan. Hopi forsa na cada uno di boso den e tarea importante aki", Minister a agrega. Pa loke ta fraccion di MEP, lider di e partido Evelyn Wever Croes tambe tabatin su mensahe” Mi kier desea tur studiante y maestronan hopi exito den e aña escolar nobo” e la pone riba su pagina di Facebook.