Paz laboral bek na Cool Casino cu intervencion di minister

ORANJESTAD – Algo mas cu un siman despues cu e trahadonan di Cool Casino (RIU Palace hotel) a protesta contra suspension di nan coleganan, paz laboral ta bek na e casino. Minister di labor Paul Croes a confirma diadomingo anochi na NoticiaCla.com cu tur 14 trahado (11 cu a walk out plus e 3 otro cu nan a sostene cu tambe tabata suspendi) ta bek na trabou. “Gerencia door di mi intermediacion a logra yega na algun acuerdo” Croes a sigui bisa NoticiaCla.com. 

DETAYE DIALUNA AWOR

E detayenan mes lo keda atende dialuna ora cu partidonan topa atrobe pa yega na un protocol y finalmente logra un CAO tambe. “Mi ta sumamente contento di e postura di madurez y tambe poniendo e interes di trahadonan prome, y tambe cu e conviccion pa yega na paz laboral” e mandatario a sigui bisa. “Ambos partido merece palabra di elogio”.

CON A YEGA NA E DEAL

E deal mes a keda cla diasabra despues cu diabierna e mandatario a reuni cu e abogadonan te laat. Diasabra den dia a logra yega na e acuerdo. “Gerencia a bay di acuerdo cu mi peticion pa logra pone tur hende bek na trabou”. No ta conoci si e trahadonan ta haya e dianan cu nan a protesta, paga, of si tin un of otro consecuencia pa e dianan ey. E mandatario no por a contesta e parti aki si.

SIMAN NOBO

Cu esey, e problema laboral, por awor, ta keda resolve na e casino y ta habri un siman nobo cu un paz laboral, y cu tur hende contento. Tabata un siman cu e trahadonan tabata protestando practicamente tur dia, for di momento cu a suspende 3 trahado inicialmente. Despues 11 trahado a bay sostene nan coleganan, pero tambe a keda suspendi. Despues nan a haya un carta di retiro manda ‘per post’. E retiro mientrastanto a wordo ‘revoca’.NOTA: e potret ta di archivo di siman pasa ora cu e trahadonan suspendi di Cool Casino tabata protesta ainda un siman pasa.