Diabierna atardi abogadonan atrobe lo purba libera detenido Carvajal

ORANJESTAD – Diabierna atardi atrobe abogadonan Chris Lejuez y Vinda de Sousa lo topa nan cliente Hugo Carvajal, pa asina purba wak si por libera nan cliente. Durante e session di diabierna atardi, Hues Comisario lo tin cu evalua si e detencion di Carvajal tabata legal, y cu si ta necesario pa prolonga su detencion cu 8 dia mas. Si esey sosode, e ta pone polis den un situacion interesante pasobra e proteccion special lo tin cu continua. Mes momento, NoticiaCla a compronde cu tin e posibilidad cu lo por transporte pa KIA, pa tin miho control riba e persona.

For di momento cu e persona aki a keda deteni diaranson anochi, e warda unda cu e ta sera, esta Centro di Husticia na Macuarima, ta completamente rondona pa polis special, tanto na banda como riba dak, pa asina evita cu hendenan cu menos bon intencion por yega serca e detenido venezolano Carvajal. Informacion cu NoticiaCla a confirma serca polis, ta cu tin miedo cu hendenan por bin ‘saca’ Carvajal for di e prison, pa miedo cu e lo por ‘papia y basha abou’ riba hopi informacion confidencial y comprometedor cu e tin riba nan. Esey ta hacie un blanco peligroso.