Mildred ‘Milly’ Schwengle ta bira minister plenipotenciario pa Aruba na Hulanda

ORANJESTAD - Mildred ‘Milly’ Schwengle ta bira minister plenipotenciario pa Aruba na Hulanda. Gabinete AVP-FUTURO a aproba su candidatura y ta mustra cu awe gobernador di Aruba SE Alfonso Boekhoudt lo hurament’e den su funcion. Sra Schwengle tabata miembro di Raad van State pa Aruba entre 2017 pa 2023. E ta un abogado di profesion tambe. 

GOBIERNO A CAMBIA DI PENSAMENTO 

Ayera ainda noticiacla a raporta cu gabinete  AVP-FUTURO a dicidi toch pa presenta un candidato como minister plenipotenciario di Aruba pa Hulanda, despues cu na september aña pasa a dicidi cu no ta manda ningun hende.  Despues cu aña pasa a busca un candidato, pa despues stop e proceso pa motibo di screening, a dicidi na october di aña pasa pa no manda ningun hende ya cu e tabata mucho caro, aunke despues a 'coregi' esaki bisando cu no ta esey ta e motibo mas. awor a dicidi atrobe pa pone un minister toch. E minister e tempo ey a bisa cu lo bin un persona, pero no ‘awor’ sino ‘despues’. Ta pensa cu awor e ‘despues’ a yega ‘awor’.

NOMBER

Den e entrevista sinembargo di ayera, e mandatario no ta specifica ken awor ta bira e persona ni pa ki tempo exacto e persona lo ocupa e funcion aki. Tambe a bisa cu den curso di un aña for di awor, ta spera cu por reusa e Arubahuis ‘renoba’.  

KICO A PASA PROME 

Aña pasa despues cu gabinete AVP-FUTURO a sinta, e intencion tabata pa manda Desiree Croes, como e minister en cuestion. Pero problema cu e partner di coalicion FUTURO, a pone cu e no por a bay mas, y e ora a busca sr Rene ‘Baba’ Herde pa carga e funcion ey. E la pasa screening y tabata cla pa bay, ora cu despues a surgi e problema di screening di candidato pa minister Mike de Meza, cu a laga e gabinete faltando un persona. A opta e ora pa usa Herde como minister local, ya cu e la pasa screening caba. Esey a nifica cu a ‘sacrifica’ e candidato pa Hulanda e ora. Tempo a transcuri y despues cu a anuncia cu ta cuminsa busca candidato nobo, diripiente a dicidi cu ‘no ta manda hende mas’, usando como argumento e.o. cu ta mucho caro pa un persona asina eynan, y cu lo opta pa manda un minister cada pasa tempo cu lo haci e trabou ey. A bisa si cu esaki ta ‘temporal’ pero no por a bisa ‘cuanto tempo’. E ultimo simanan partido MEP como partido di oposicion a bolbe cu e tema, bisando cu Aruba no por keda sin un minister plenipotenciario. Cu e declaracion awe di prome minister Eman, esaki ta contesta e parti ey. Di otro banda, ta keda e pregunta, ken ta bira e minister, pakico awor, y con lihe esaki ta keda concretisa.