Minister Croes no ta contento cu maneho RIU hotel

ORANJESTAD – Minister di Labor Paul Croes a expresa su preocupacion cu e situacion na Riu hotel. Simplemente bisa, e no ta nada contento con e situacion laboral ta desaroyando na e hotel. El a bisa cu e preocupacion aki tin di haber cu diferente aspecto, no solamente pa e aspecto di referendum di e trahadonan pa haci uzo di su derecho pa eligi un representacion sindical. Minister Croes a bisa cu e hotel aki ta un di e luganan cu nan ta hayando hopi keho di parti di departamento di Labor.

PASADO CU WESTIN

El a haci referencia con e situacion a bay den pasado cu e trahadonan di Westin hotel. Igualmente recientemente e tin cu bisa cu e departamento di IASA, Warda Nos Costa, departamento di Labor, y polis a wordo envolvi den un control ariba documentacion legal y aspectonan labora. Den e control aki nan por a confronta -segun e mandatario- hopi iregularidad cu ta sosode den e hotel menciona.

SITUACION LABORAL

E mandatario tabata cla pa bisa cu e no ta nada contento cu e forma cu e operacion actualmente ta tumando luga cu personanan indocumenta trahando. “Nos ta trahando riba un plan pa mira di ki forma, di un forma mas efectivo pa atende cu e situacion laboral cu ta tumando luga tambe den aspecto di siguridad di e trahadonan”, el a laga sa.

ALTURA DI PRECUPACION

Croes a señala cu nan ta na altura di diferente preocupacion y diferente critica cu tin ariba Riu hotel. Pero el a enfatisa cu nan lo kier haci accionnan di un forma cu e mensahe ta yega y cu nan ta bay mehora tambe e situacion laboral di e trahadonan.

NO KIER PAPIA CU GERENTE

E intencion no ta pa papia cu e gerente di e hotel di banda di e mandatario. Sinembargo el a laga sa cu nan tin contacto cu e conseheronan legal di parti di gerencia di Riu, pero e mensahe di gobierno den e momento aki ta cu nan no ta contento di e forma con Riu ta operando y tratando su trahadonan na e establecimento