SIMAR riba normanan di admision MAVO-HAVO y mas

ORANJESTAD - SIMAR a sigui e desaroyo aki di serca y ta di opinion cu e asunto aki nunca mester a yega asina leu. Cu mester por midi e studiante ta un hecho, pero mester tin espacio pa oportunidad igual pa desaroyo di un mucha. Un di e problemanan mas grandi na Aruba ta cu no tin muchu escohencia despues di MAVO pa e studiante cu no por/ no ta desea di bay HAVO. EPI (MBO) su escohencia nan ta limita y banda di esaki e posibilidadnan di scohe ta mara na e paketenan di vak cu e studiante ta yega cun’e. Manda un hoben cu ta den pleno desaroyo drenta nos mercado laboral of un tipo di enseñansa cu no ta di su preferencia cu oportunidad grandi di bira un “drop out” no ta ni na su fabor, ni na bienestar di desaroyo di nos pais en general.

SUBSIDIO SKOA

E problema di subsidio di SKOA ta mas grandi cu loke hopi ta pensa. Despues di sentencia di Hues, cual ta bisa cu gobierno di Aruba mester percura pa tur gastonan di enseñansa y cu mayornan no mester paga “schoolgeld”, scolnan di SKOA a haya nan mes confronta cu problemanan hopi serio pa cu apertura di e aña escolar nobo. Desde aña escolar pasa caba hopi a haya nan mes den “pijnbank” pa motibonan financiero, ya cu diferente porta a sera pa SKOA dor di su cuentanan di credito habri, debi na e problematica entre SKOA y minister di Enseñansa. Despues cu na varios ocacion SIMAR a traha conhuntamente cu diferente Minister di Enseñansa, incluso cu minister Michelle Hooyboer Winklaar pa hisa e “normbedrag” pa gobierno por subsidia e diferente “stichting’nan cu e suma REAL pa nan gastonan, ainda no a yega na e subsidio corecto. E normanan pa cada alumno ta data for di hopi aña atras cual mester ser ahusta na gastonan real di awendia. Awor cu sentencia a cay, ni maske SKOA entrega su relatonan anual, e subsidio lo no ta basa riba e suma real di gastonan anual di su scolnan. Specialmente scolnan cu tin airco. Preguntanan cu SIMAR tin ta cu awor cu no ta permiti pa SKOA aumenta placa di scol, con ta para cu esnan cu si a paga caba y cu placa di airco? Porcierto airco for di añas caba no ta un luho, sino un necesidad. Tambe ta puntra con ta bay atende cu e otro directivanan cu por cierto segun SIMAR tur ta cobrando sumanan hopi mas halto cu di SKOA? Incluso scolnan cu ta cay directamente bou di gobierno. Scolnan cu a ser renoba ultimamente a haya airco inclui, gobierno lo paga scolnan cu a percura pa airco riba nan mes, e gastonan di esakinan?

E REALIDAD SCONDI

SIMAR ta basa riba e realidad y riba hecho. Mayoria di e cabesante-, director y maestronan di scolnan di SKOA semper a percura pa trabou sigui cana a pesar cu e frase “no tin placa” a ser graba den nan sistema. Placa pa material didactico, decoracion y di mantencion hopi biaha ta caba na caminda. Cuanto scol di SKOA tin airco cu ta nan personal cu ayudo di mayornan/ sponsors a logra pone pa nan scolnan? Masha hopi gasto di scolnan catolico ta ser cubri pa “potnan” cu e scol mes ta crea y pa e cartera di e docente (cual absolutamente no ta su deber) ya cu e tin su muchanan na pecho y kier traha den un ambiente positivo. E berdad aki ta scondi segun SIMAR ya cu e scol y e maestro mes a y ta sigui busca solucion. Cabesante y directornan ta yena un lista di deseo , e asina yama “wenselijkheidsbegroting” tur aña pa Directie Onderwijs y pa Minister. E lista aki, cual en realidad ta necesidad y no deseo, practicamente no ta ser honra, ya cu nunca e ta posibel pa motibonan financiero. Tin discrepancia grandi entre scolnan publico (directo bou di gobierno) y esnan cu ta cay bou di e diferente directivanan. E.o. scolnan publico no tin necesidad di cremencha pa yega na material, tin trahadornan administrativo, trahador social y asistente den klas. SIMAR a papia cu Minister Hooyboer Winklaar tocante e asuntonan aki y a vocifera su preocupacion. Awor cu un aña escolar nobo ta habri, nos ta spera cu e problemanan aki keda resolvi pronto, ya cu tin hopi mal contento, inseguridad y incertidumbre.

RESTRUCTURACION SALARIAL

Durante e ultimo reunion cu minister Hooyboer-Winklaar, directiva a haya di tende cu parti di fondo Europeo lo ser uza pa caba cu e trabounan necesario y introduci e Restructuracion Salarial di esnan cu ta traha den enseñansa. E maestro tin mas di dos decada SIN conoce aumento salarial y ta yega su salario top na su 38 aña di edad. Tin maestro cu a cuminsa traha y baha cu pensioen sin a conoce aumento salarial, mientras costo di bida a subi drasticamente e ultimo temponan, specialmente cu medidanan introduci pa gobierno. E punto aki tin mas di 8 aña den “pipeline” y maestronan merece pa e drenta na vigor “for once and for all” . Lo ta un lastima segun SIMAR si maestronan mester dicidi di pone traboau abou pa exihi nan derecho.

INCERTIDUMBRE, INQUIETUD, INIGUALDAD, INSEGURIDAD

Aña escolar 2014-2015 a sera cu capitulonan amargo pa loke ta seguridad den enseñansa. Incluso agresion y trato inhusto contra di diferente maestro a tuma lugar. Nombracionnan nobo den diferente tipo di enseñansa a trece hopi intranquilidad y incertidumbre bou di personal y dirigentenan escolar. Scarcedad di maestro a trece cambionan grandi den cultura di scolnan, specialmente den esnan basico. E reto pa traha te cu edad di 65 aña cu posibilidad hopi limita di cambio, crecemento o trabou mas suave/diferente, ta enorme y “stressful” pa djis pensa riba dje. Problemanan social ta birando cada dia mas grandi y ta parti di e bida diario di scol, caminda e maestro ta haya su mes confronta cu e consecuencianan di tal. SIMAR ta forma parti di comision “Gedragscode”, cual pronto lo ser introduci na personal, mayornan y alumno y studiantenan. Tambe SIMAR lo percura pa oficialisa e procedura den caso di entregamento di keho.

DESEO

Lastimamente hopi punto pisa. Pero mey mey di tur e negativismo aki, e maestro, e docente, e director, e manager, e asistente y tur esnan envolvi den e mundo di enseñansa ta haci nan maximo esfuerso, manera semper nan a haci, pa habri e aña escolar cu e mucha y e studiante central. Ban spera cu pronto nos mira solucion pa tur e puntonan menciona. SIMAR ta desea cada un di boso un felis comienso y un aña escolar 2015-2016 productivo.