Aruba lo discuti visa pa venezolano cu gobierno hulandes

ORANJESTAD – Gobierno di Aruba lo discuti posibel introduccion di visa pa venezolano, durante nan bishita na Hulanda otro siman. Tanto prome minister Mike Eman, presidente di sindicato FTA Hubert Dirksz y presidente di ATIA, Michel Henriquez a confirma esaki na NoticiaCla.com diahuebs. Gobierno a informa e gremionan di e intencion aki durante nan encuentro diaranson ultimo ora cu a dialoga riba e tema di seguridad na Aruba.

FTA

Segun Dirksz, durante e dialogo ayera cu prome minister Eman, e mandatario a bisa e gremionan di e intencion aki. Hunto cu e parti di visa, lo discuti e posibilidad di e compania Citgo pa tuma e refineria di Valero over.

ATIA

Di parti di Henriquez, e la confirma cu Eman a toca e tema, mirando e situacion fastioso cu tin na Aruba rond di e venezolanonan cu ta creando problema. “Enberdad e mandatario a bisa esey cu e ta un di e temanan cu lo discuti durante su bishita na Hulanda otro siman” Henriquez a confirma na NoticiaCla.com.

PREMIER EMAN

Di parti di premier Eman, a confirma cu a papia mas en general, esta cu ‘ta bay Hulanda pa atende e topiconan di Venezuela y Valero’. E mandatario tabata mas cauteloso, mirando e situacion actual (na Venezuela), y e hecho cu awor ta negoshando awor cu Citgo, cu de hecho ta venezolano.

POSIBILIDAD DI VISA

Pa masha tempo, ta papiando riba e situacion di visa pa venezolano, y cu esey por ta un posibilidad aunke ainda no deseabel. For di minister di turismo Otmar Oduber, e la vocifera den pasado caba cu e no ta mucho pro pa tin un visa pa venezolano y ta prefera pa por control’e manera e ta aworaki. Pasobra ora cu bo introduci visa, hendenan lo purba drenta toch di un manera ‘clandestino’ manera cu ta sosodiendo cu e.o. colombianonan (y un grupo di venezolano tambe).

SITUACION VENEZUELA

Mirando e situacion cu tin aworaki na Venezuela, y cu tin mas y mas venezolano ta purbando di drenta e islanan ABC, tin un presion enorme pa tuma e pasonan necesario pa evita un exodus pa e islanan aki. Mientras cu di un banda ta papia di un grupito cu ta presta nan mes pa haci cierto proceso pa gana ‘placa’ facil, y cu nan tambe ta contribui na e economia di Aruba, e grupo aki tin atencion di gobierno. Den pasado recien caba ATA tambe a mustra cu no ta e tipo di ‘turista’ aki nan kier for di Venezuela, y cu nan ta vigilando e situacion ey di serca.

DILEMA

Ta conoci cu aworaki e dos topiconan aki ta bira un dilema, mirando cu di un banda kier toca e topico di introduccion di visa pa e pais cu mes momento por bira un socio economico si Citgo bira e socio nobo pa Aruba den refina petrolio. Pues e discusionnan lo ta di un nivel cauteloso, pero sigur necesario manera cu e prome mandatario mes a indica.